Ирандын жогорку коопсуздук органы Израилдин ядролук объектилери тууралуу чалгын маалыматтарын алганын билдирип, эгер Израиль Иранга чабуул жасаса Иран күчтөрү жооп кайтара аларын айтты.

Израиль Ирандын ядролук объектилерине чабуул жасай турганын бир нече жолу эскертип, Тегерандын атомдук куралга ээ болушуна жол бербөө максатын кабарлаган. Бирок Иран бул айыптоолорду четке кагып, ядролук куралга умтулбаганын айтып келет.

Израилдин бул эскертүүлөрү Тегеран менен Вашингтон апрель айында ядролук сүйлөшүүлөрдү баштагандан бери күчөдү.

Ирандын Жогорку Улуттук Коопсуздук Кеңеши билдиргендей, алардын чалгын маалыматтары "Ислам согушкерлерине сионисттик режим Ирандын ядролук объектилерине чабуул жасаса Израилдин жашыруун ядролук объектилерин заматта сокку уруу мүмкүнчүлүгүн” берет.

Ошондой эле, Иран аскердик же экономикалык инфраструктурасына Израилдин кандайдыр бир чабуулуна "толугу менен пропорционалдуу түрдө" жооп кайтарарын баса белгиледи.

Ишемби күнү мамлекеттик маалымат каражаттары Тегеран жашыруун операция аркылуу Израилдин "стратегиялык жана сезимтал" чалгын маалыматтарын, анын ичинде ядролук объектилери жана коргонуу пландары тууралуу документтерди алганын кабарлады.

Ирандын чалгын министри Исмаил Хатиб кийинчерээк бул документтер Батыш өлкөлөрүнө, анын ичинде АКШга тиешелүү маалыматтарды камтыганын жана "жакында жарыяланарын" айтты.

Дүйшөмбү күнү Ирандын Ислам революциялык гвардиясынын башчысы Хоссейн Салами бул чалгын маалыматтары эгерде кагылышуу болуп калса "Иран ракеталарынын соккусунун так болушуна" шарт түзөрүн билдирди.

Өткөн жылы Газа согушунун алкагында эки тарап биринчи жолу түз чабуулдарды жасашкан.