Орусия менен Украинанын ортосундагы тынчтык сүйлөшүүлөрүн жума күнү Стамбулда уланта турган делегациялар аныкталды.
Сүйлөшүүлөргө Түркиянын тышкы иштер министри Хакан Фидан, АКШнын мамлекеттик катчысы Марко Рубио жетектеген делегация, Украинанын коргоо министри Рустем Умеров башында турган украин делегациясы жана Орусиянын президенти Владимир Путиндин кеңешчиси Владимир Мединский жетектеген орус делегациясы катышат.
Украинанын президенти Владимир Зеленский тынчтык сүйлөшүүлөрүнө катышуу үчүн расмий делегация түзүү боюнча жарлык чыгарды. Түркия, Орусия жана АКШнын өкүлдөрү менен жолугушуусу пландалган бул делегацияны коргоо министри Рустем Умеров жетектейт.
Украин делегациясынын курамына төмөнкүлөр кирет: тышкы иштер министринин орун басары Сергей Кислица, Коопсуздук кызматынын (СБУ) жетекчисинин орун басары Александр Поклад, Тышкы чалгындоо кызматынын жетекчисинин орун басары Олег Луховский, Башкы штабдын жетекчисинин орун басары Алексей Шевченко, Коргоо министрлигинин Башкы чалгындоо башкармалыгынын (ГУР) жетекчисинин орун басары Вадим Скибицкий, Аба күчтөрү командирлиги штабынын жетекчисинин орун басары Евгений Шинкарев, Деңиз күчтөрү командирлиги штабынын жетекчисинин орун басары Александр Дьяков, Башкы штабдын Борбордук юридикалык башкармалыгынын эл аралык жана операциялык укук бөлүмүнүн жетекчиси Алексей Маловатский, Башкы штабдын негизги операциялар башкармалыгынын улук офицери Александр Шерихов, Куралдуу күчтөрдүн башкы командиринин колдоочу бөлүмүнүн протоколдук офицери Георгий Кузьмичев жана Президенттик аппараттын жетекчисинин кеңешчиси Александр Бевз.
Орус делегациясын Владимир Мединский жетектейт. Анын курамында тышкы иштер министринин орун басары Михаил Галузин, Орусиянын Башкы штабынын Башкы чалгындоо башкармалыгынын (ГРУ) директору Игорь Костюков жана коргоо министринин орун басары Александр Фомин бар.
Ошондой эле делегациянын курамына төмөнкү адистер кирет: Башкы штабдын маалымат бөлүмүнүн директорунун орун басары Александр Зорин, Орусиянын президентинин гуманитардык тармак боюнча мамлекеттик саясат департаментинин директорунун орун басары Евгения Подобреевская, Орусиянын Тышкы иштер министрлигинин Көз карандысыз мамлекеттер шериктештигинин экинчи департаментинин директору Александр Полищук жана Орусиянын Коргоо министрлигинин Эл аралык аскердик кызматташтык боюнча башкы башкармалыгынын директорунун орун басары Владимир Шевцов.
