АКШнын Мамлекеттик департаменти дүйшөмбү күнү Федералдык реестрдин жарыялана элек билдирүүсүнө караганда, “Жабхат ан-Нусра” деп аталган “Хайат Тахрир аш-Шам” (HTS) тобунун чет элдик террордук уюм статусун алып салды.

Мамлекеттик катчы Марко Рубио 23-июндагы жана шейшемби күнү жарыялана турган билдирүүсүндө: «Башкы прокурор жана каржы министри менен кеңешип, Жабхат ан-Нусра катары билинген жана Хаят Тахрир аш-Шам (жана башка каймана аттары) деп аталган топтун Чет элдик террордук уюм катары аныкталышын жокко чыгаруудамын», - деди.

Бул чечим жарыяланары менен дароо күчүнө кирет.

“Хайат Тахрир аш-Шам” 2018-жылы АКШнын Чет элдик террористтик уюмдар тизмесине киргизилген. АКШ бул уюмду "Ал-Каида" тобу менен тыгыз байланышта деп тааныган.

Өткөн жылдын 8-декабрында Сирияны 25 жылдай башкарган Башар Асад, режимге каршы топтор Дамаскты тез арада басып алгандан кийин Орусияга качып кеткен. Бул чабуулду Хайят Тахрир аш-Шам жетектеген.

Январь айында Сирияда Ахмед Шаранын жетекчилиги астында өткөөл өкмөт түзүлгөн.

Өткөн айда АКШнын президенти Дональд Трамп Сирияга карата АКШнын санкцияларын токтотуу боюнча аткаруу буйругуна кол койгон.

Май айында Трамп Эр-Рияддагы инвестиция форумунда Сирияга карата “катуу жана кыйратуучу” санкцияларды алып салуу ниетин жарыялаган.

Эртеси Трамп Сауд Арабияда Шараа менен тарыхый сүйлөшүүлөрдү өткөрдү. Бул АКШ менен Сирия лидерлеринин 25 жылдагы биринчи жолугушуусу эле.