Газага багыт алган жардам кербениндеги 223 эл аралык активист Израиль күчтөрү тарабынан камакка алынды. Бирок түрк капитаны Мухаммед Күчүктигиндин жетекчилигиндеги "Микено" аттуу кеме 20дан ашуун мыйзамсыз тоскоолдуктардан өтүп, Палестина сууларына жетүүгө үлгүрдү.
Глобалдык Сумуд флотилиясы бейшемби күнү X платформасы аркылуу жарыялаган билдирүүсүндө, шаршемби түнүнөн бери 15 кемеге израилдик күчтөр кол салганын, дагы сегиз кеме кол салууга дуушар болушу мүмкүн экенин же кол салуу астында турганын кабарлады.
Флотилия, кол салууга дуушар болгон кемелердеги 223 активисттин ысымдарын жана улуттарын Instagram аркылуу жарыялады. Ошол эле учурда, расмий флотилия трекери 20 кемеге кол салуу жасалганын, 24 кеменин болсо Газага карай жолун улантып жатканын көрсөттү.
Глобалдык миссияга катышкан түрк активисти Эрдем Өзверендин айтымында, ал отурган кеме Газадан 30 деңиз милине жетпеген аралыкта болгон.
Газага багыт алган 50дөн ашуун кеме
Гуманитардык жардам жана медициналык буюмдар жүктөлгөн кемелерден турган флотилия августтун аягында жол тарткан. Бул бир нече жылдардан кийин Газага жөнөтүлгөн мындай чоңдуктагы биринчи жардам кербени болду. Флотилиянын курамында 50гө жакын кеме жана 45тен ашык өлкөдөн 532 жарандык ыктыярчы бар.
Израиль 18 жылдан бери 2,4 миллион калкы бар Газаны курчоодо кармап келет жана март айында чек ара өткөрмө пункттарын жаап, азык-түлүк жана дары-дармек жеткирүүнү токтоткон. Бул абал аймакты ачарчылыкка түрттү.
2023-жылдын октябрынан бери Израилдин бомбалоосунан 66 миңден ашуун палестиналык, алардын көбү аялдар жана балдар каза тапты. БУУ жана укук коргоо уюмдары аймак жашоого жараксыз болуп бара жатканын, ачарчылык жана оорулар тез жайылып жатканын бир нече жолу эскертишкен.
