Мамлекеттик маалымат агенттигинин маалыматына ылайык, жума күнү Сириянын Хомс шаарындагы бир мечитте болгон жардыруудан беш киши каза болуп, жыйырма бир киши жаракат алган.
Сирия араб маалымат агенттиги (SANA) алдын ала маалыматтарга ылайык, жарылуу Вади ал-Дахаб районундагы Имам Али ибн Аби Талиб мечитинде болгонун билдирди.
Агенттик кол салуунун мүнөзү иликтенип жатканын билдирди.
Кол салуунун жоопкерчилигин эч ким моюнга алган жок.
Коопсуздук күчтөрүнүн билдиргенине караганда шаршемби күнү Сириянын түндүк батышындагы Идлиб аймагындагы бир курал кампасында да жарылуу болду. Бул жердеги окуяда беш киши каза болуп тогуз киши жараланды.
Идлиб коопсуздук күчтөрү шаршемби күнү Кафр Тахарим поселогундагы жарылуунун “ракета жана ок - дары болгон кампадан чыкканын жана жакын жердеги курулуш аянтчасында жүрүп жаткан иштерден улам болгонун” билдирип, беш курулуш жумушчусунун каза болгонун айтышты.
