АКШнын президенти Дональд Трамп бейшемби күнү эки улуттук майрамды “Жеңиш күнү” деп өзгөртүү ниетин билдирди. Бул анын өлкөнүн аталыш системасын өзгөртүүгө карата акыркы аракети болуп саналат.

"Мен 8-майды Экинчи Дүйнөлүк Согуштун Жеңиш күнү жана 11-ноябрды Биринчи Дүйнөлүк Согуштун Жеңиш күнү деп өзгөртөм", - деди Трамп Truth Social платформасындагы билдирүүсүндө.

Жеңиш күнү Европа Биримдигинде 8-майда, ал эми мурдагы Советтер Союзуна кирген өлкөлөрдө 9-майда белгиленет. Бул күн Германиянын шартсыз багынып беришинин Союздаш мамлекеттер тарабынан кабыл алынышынын жылдыгын билдирет.

АКШда бул күн айрым адамдар тарабынан белгиленгени менен, Европадагыдай расмий майрам эмес.

“Биздин көптөгөн союздаштарыбыз жана досторубуз 8-майды Жеңиш күнү катары белгилешет, бирок биз Экинчи дүйнөлүк согушта жеңишке жетүүдө башка бардык өлкөлөргө караганда көбүрөөк салым кошконбуз,” – деп жазды Трамп өз билдирүүсүндө.

11-ноябрь биринчи жолу АКШнын мурдагы президенти Вудро Вильсон тарабынан Биринчи Дүйнөлүк Согушта куралдуу кагылыштарды токтоткон 1918-жылкы тынчтык келишимин эскерүү үчүн "Ок атышпоо күнү" деп аталган.

Азыр бул күн АКШда “Ардагерлер күнү” деп аталат жана АКШнын куралдуу күчтөрүндө кызмат өтөгөн америкалыктарды урматтоо максатында белгиленет. “Биз эки согушта тең жеңишке жеттик, биздин күчүбүз, эрдигибиз жана аскердик акылмандыгыбыз боюнча эч ким бизге тең келе алган жок, бирок биз эч нерсени белгилебейбиз – себеби бизде муну кантип майрамдоону билген лидерлер жок!” – деп уланткан Трамп “Биз кайрадан жеңиштерибизди белгилей баштайбыз!”,-деди.

Ак үй тарабынан майрамдардын аталышын өзгөртүү боюнча эч кандай аткаруу буйругу же расмий жарыя азырынча жарыялана элек.

Трамп өзүнүн экинчи мөөнөтүндө АКШнын коомдук жашоосунун айрым бөлүктөрүнүн аталышын өзгөртүүгө бир нече жолу аракет кылган. Мисалы, “Жергиликтүү элдер күнү” майрамын кайрадан “Колумб күнү” деп өзгөртүү же “Мексика булуңун” “Америка булуңу” деп атоо сыяктуу сунуштарды киргизген.