АКШ президенти Дональд Трамптын болот жана алюминий импортунун баарына карата тарифтерди жогорулатуу чечими күчүнө кирди. Бул кадам АКШнын пайдасына дүйнөлүк соода эрежелерин өзгөртүүгө багытталган аракеттерди күчөтүп, Европанын тез жооп кайтаруусуна алып келди.

Трамптын бул чечими америкалык болот жана алюминий өндүрүүчүлөрүн коргоону күчөтүп, дүйнөлүк тарифтерди 25 пайызга чейин көтөрдү. Ошондой эле, бул тарифтер металлдардан жасалган жүздөгөн буюмдарга, мисалы, бурама жана гайкалардан баштап, бульдозердин бычактарына жана минерал суусундук банкаларына чейин жайылды.

Европа комиссиясы бул кадамга дароо жооп берип, келерки айдан баштап АКШнын 26 миллиард евро (28 миллиард доллар) баасындагы товарларына каршы тарифтерди киргизерин билдирди.

АКШнын жакын өнөктөштөрү Канада, Британия жана Австралия бул жалпы тарифтерди сынга алышты. Канада өз ара чараларды караштырып жатканын билдирсе, Британиянын бизнес жана соода министри Жонатан Рейнольдс: "улуттук кызыкчылыкты коргоо үчүн бардык варианттар каралат",-деп айтты.

Тарифтердин күчүнө кирүү мөөнөтүнө жакын, шейшемби күнү Трамп Канадага болот жана алюминий экспортунун тарифин 50 пайызга чейин көтөрүү менен коркутту. Бирок, Онтарио провинциясынын премьер-министри Даг Форд АКШнын мурунку тарифтери алынганга чейин Миннесота, Мичиган жана Нью-Йорк штаттарына электр энергиясынын экспортуна 25 пайыздык кошумча төлөм киргизүү чечимин токтотууга макул болгондон кийин, Трамп бул пландардан баш тартты.

Ак Үйдүн өкүлү бул басымды "америкалык эл үчүн жеңиш" деп мүнөздөдү.

АКШнын Бажы жана чек ара кызматы тарифтик квоталардын алкагында бажы төлөмдөрүнөн бошотулган импортту жарым түнгө чейин токтотуп, шейшемби күнү жергиликтүү убакыт боюнча саат 16:30га чейин квота документтери иштелип чыгышы керектигин билдирген.

Өнөр жай топтору тарифтердин кайтарылышын кубатташты.

Бул кадам АКШнын болот өндүрүүчүлөрү тарабынан колдоого алынып, Трамптын 2018-жылдагы металлдарга карата тарифтерин калыбына келтирүү катары бааланды. Бул тарифтер мурда өлкөлөргө берилген жеңилдиктер жана квоталар, ошондой эле миңдеген өнүмдөргө карата өзгөчө шарттар менен алсыратылган болчу.

Болот өндүрүүчүлөр ассоциациясынын президенти Филип Белл: "Президент Трамп, тарифтердеги көптөн бери колдонулуп келген боштуктарды жапкандыгы менен, АКШнын болот өнөр жайын кайрадан күчтөндүрөт," - деди .

"Жаңы тарифтер америкалык болот өндүрүүчүлөргө жогорку маяналуу жаңы жумуш орундарын түзүүгө жана адилетсиз соода практикаларына туш болбой, чоң инвестицияларды жасоого мүмкүнчүлүк берет," - деп кошумчалады Белл.

Канаданын энергетика министри Жонатан Уилкинсон Рейтер агенттигине АКШнын тарифтери улана берсе, Канада мунай экспортун чектөө же минералдарга экспорттук төлөмдөрдү киргизүү сыяктуу тарифтик эмес чараларды колдоно аларын билдирди.

Кытай алюминий жана алюминийден жасалган товарлардын экинчи чоң жеткирүүчүсү бойдон калууда, бирок буга чейин эле демпинг жана субсидиялар боюнча айыптоолорго байланыштуу жогорку тарифтерге туш болгон. Ошондой эле, Трамп өткөн айда фентанил соодасына байланыштуу жаңы 20 пайыздык тариф киргизген.