Исландиянын тарыхында биринчи жолу аралда чиркейлер байкалды. Үч үлгү ушул айда Хвалфьордурдун жакынындагы Кжос деп аталган айыл өрөөнүндө табылды.
Бул табылганы курт-кумурскаларга кызыккан Бьорн Хьялтасон Facebook'тагы "Skordyr a Islandi" (Исландиядагы курт-кумурскалар) тобунда бөлүшкөн жана бул тууралуу Исландиянын Улуттук телерадиокомпаниясы дүйшөмбү күнү билдирди.
Чиркейлердин үлгүлөрү анализ үчүн Исландиянын Табигый Тарых Институтуна берилди. Ал жерде энтомолог Маттиас Альфредссон булардын чындыгында чиркей экенин тастыктады.
Бул түр Түндүк Европада таралган суукка чыдамдуу чиркейдин Culiseta annulata түрү деп аныкталган.
Матиас чиркейлер тууралуу буларды айтты "Алар кышы бою көбүнчө жертөлөлөр жана мал сарайлары сыяктуу көмүскө жерлерде өздөрүн жылуу кармашат. Чиркейдин бул жерде туруктуу калып калышы толук ыктымал".
Чиркейлер мезгил-мезгили менен учактар аркылуу Исландияга мыйзамсыз жүргүнчү катары барып калса да, буга чейин алардын аралда жашагандыгы тууралуу эч кандай далил табылган эмес.
Окумуштуулар чиркейлер качандыр бир күнү Исландияда пайда болушу мүмкүн деп көптөн бери болжоп келишкен. 2015-жылы чаккан майда чымындар бул жерде туруктуу жашап калгандан кийин бул мүмкүнчүлүк көбөйгөн.
Исландияда чиркейлердин табылышы климаттык жана экологиялык кризистер суукка чыдамдуу курт-кумурскалардын жашоо чөйрөсүн түндүккө карай кеңейтип жатканын көрсөтүүдө.
