Кыргызстан быйыл төрагалык кылган Жамааттык Коопсуздук Келишими Уюмуна (ЖККУ) мүчө-мамлекеттердин лидерлеринин жыйынын өткөрдү.
Бишкектеги "Ынтымак-Ордо" президенттик сарайында Кыргызстандын президенти Садыр Жапаров тарабынан өткөрүлгөн саммитке Орусиянын президенти Владимир Путин, Беларустун президенти Александр Лукашенко, Казакстандын президенти Касым-Жомарт Токаев, Тажикстандын президенти Эмомали Рахман жана ЖККУнун башкы катчысы Имангали Тасмагамбетов катышты.
ЖККУга мүчө Армения саммитке катышкан жок. Саммитке чейин Кыргызстандын тышкы иштер министри Жээнбек Кулубаевдин төрагалыгы астында Тышкы иштер министрлеринин кеңешинин, Коргоо министрлеринин кеңешинин жана Коопсуздук кеңештеринин катчыларынын комитетинин биргелешкен жыйындары өттү.
ЖККУга мүчө-мамлекеттердин лидерлери катышкан тар чөйрөдөгү жыйын жабык эшик артында өттү.
Саммиттин кеңейтилген сессиясындагы сөзүндө Жапаров ЖККУнун кезектешкен төрагалыгы 2026-жылдын 1-январынан тартып Орусияга өтөөрүн жарыялады. Орусиянын президенти Путин ЖККУнун кезектешкен төрагалыгы «Көп полярдуу дүйнөдө жамааттык коопсуздук: Жалпы максат, биргелешкен жоопкерчилик» урааны астында ишке ашаарын билдирди.
Жапаров кызматты аяктап жаткан башкы катчы Имангали Тасмагамбетовго кошкон салымы үчүн ыраазычылык билдирип, ага ЖККУнун атынан сыйлыкты тапшырды.
Кыргыстандык Таалатбек Масадыков 2026-жылдын 1-январынан тартып башкы катчы болуп дайындалды.
Бир катар документтерге кол коюлган сессияда ЖККУнун ичинде маалымат жана талдоону башкаруу бөлүмүн түзүү чечими кабыл алынды.
Тасмагамбетов басма сөз жыйынында уюмдун маалымат жана талдоону башкаруусунун маанисин түшүндүрдү.
