Египет дүйшөмбү күнү Кызыл деңиздеги Шарм-эль-Шейх шаарында эл аралык тынчтык саммитин өткөрөт. Бул саммитти Египеттин президенти Абдель Фаттах ас-Сиси жана АКШнын президенти Дональд Трамп биргелешип жетектешет.
Ишемби күнү кечинде жарыяланган президенттик билдирүүдө саммитке 20дан ашуун өлкөнүн лидерлери катышары айтылды.
Саммиттин максаты — “Газадагы согушту токтотуу, Жакынкы Чыгышта тынчтык жана туруктуулукту камсыз кылуу аракеттерин күчөтүү жана аймактык коопсуздуктун жаңы баскычын баштоо” деп билдирүүдө белгиленген.
Бул саммит “АКШ президенти Трамптын аймакта тынчтыкты камсыз кылуу боюнча көз карашы жана дүйнө жүзүндөгү жаңжалдарды токтотуу үчүн жасаган тынымсыз аракеттеринин алкагында өткөрүлүп жатат” деп кошумчаланган.
Трамп шаршемби күнү Израиль менен ХАМАС анын 29-сентябрда сунуштаган 20 пункттан турган планын ишке ашыруунун биринчи баскычына макулдашканын жарыялаган. Бул план Газада ок атышууну токтотууну, Израилдик туткундарды бошотуу үчүн 2000дей палестиналык туткундарды алмашууну жана Израиль аскерлеринин аймактан акырындык менен чыгып кетүүсүн камтыйт.
Пландын биринчи баскычы жума күнү жергиликтүү убакыт боюнча саат 12:00дө (09.00 GMT) күчүнө кирди.
Пландын экинчи баскычы Газада жаңы башкаруу механизмин түзүүнү, палестиналыктардан жана араб-ислам өлкөлөрүнүн аскерлеринен турган коопсуздук күчтөрүн түзүүнү жана ХАМАСты куралсыздандырууну камтыйт.
2023-жылдын октябрынан бери Израилдин чабуулдарынан Газада көбү аялдар жана балдардан турган 67600дөн ашуун палестиналык каза болуп, аймак жашоого жараксыз абалга келген.
