Түркиянын Улуттук Чалгындоо Уюму (MIT) жетекчилер «MONITUM» деп мүнөздөгөн татаал контртыңчылык операциясынын алкагында Израилдин чалгындоо агенттиги «Моссад» үчүн иштеген деп шектелген эки адамды камакка алды.
Түркиянын коопсуздук булактары жума күнү Мехмет Будак Деря менен Вейсел Керимоглунун Улуттук Чалгындоо Уюму,Стамбул башкы прокурорлугу жана Стамбул коопсуздук директорлугунун террор менен күрөшүү бөлүмү тарабынан координацияланган операциялардын жүрүшүндө кармалганын билдиришти.
Тергөөнүн маалыматы боюнча, тоо-кен инженери Деря 2005-жылы компания негиздеп, Мерсиндин Силифке районунда мрамор карьерин ачып, кийинчерээк эл аралык соодага кирген. Дерянын бир нече өлкөлөрдөгү өсүп жаткан бизнес байланыштары Израилдин чалгындоо кызматынын көңүлүн бурган.
Булактардын маалыматы боюнча, 2012-жылдын сентябрь айында Израиль тарабынан түзүлгөн "Али Ахмед Яссин" деген код атын колдонгон адам Дерянын кеңсесине келип, кызматташууну сунуштаган.
2013-жылдын январында Деря Европада бир жыйын учурунда Моссад агенттери менен тааныштырылган.
Үчүнчү өлкөлөрдө өткөрүлгөн жыйындар
Бул байланыштар менен «Луис» код атын колдонгон Моссад офицери Палестина тектүү түрк жараны Вейсел Керимоглунун жумушка алынышын талап кылган. Айтылгандарга караганда бул эки адамга бардык иш-аракеттер жана байланыштар боюнча биргеликте отчет даярдоо тапшырмасы берилген.
Коопсуздук булактары Дерянын Европа өлкөлөрүндө «Луис», «Жезус/Хосе», «Др. Роберто/Рикардо», «Дан/Деннис», «Марк», «Элли/Эмми» жана «Майкл» сыяктуу код аттары менен бир нече Моссад оперативдери менен жолугушууларды өткөргөнүн билдиришти.
Бул эки адам биринчи кезекте аймактагы Израилдин саясатын сындаган палестиналыктар тууралуу социалдык жана коммерциялык байланыштар аркылуу маалымат топтоп, адамдар, жерлер жана байланыштар жөнүндөгү деталдарды Израилдин чалгындоо кызматына жеткирип турганы айтылууда.
Дерянын өзгөчө Газага кирүүгө уруксат алууга аракет кылуу, ал жердеги кампа обьектилерине чалгындоо жүргүзүү жана Моссадга сүрөттөрдү жөнөтүү менен айыпталууда.
Ошондой эле, документте Керимоглунун 2016-жылы дрон тетиктери менен соода кылууга киришүүнү сунуштаганы, бул идея Израилдин чалгын кызматына жеткирилгени жана керектүү материалдарды Моссаддын бергени айтылууда.
Жетекчилер дрондорду сатуу боюнча сүйлөшүүлөр жүргүзүлгөн Мохамед Зуаринин 2016-жылдын декабрында Тунисте өлтүрүлгөнүн жана бул операциянын Израиль тарабынан ишке ашырылганын кабарлашты.
Операциялык коопсуздуктун алкагында Израилдин чалгындоо кызматы Деряны шифрленген байланыш системалары менен камсыздап, аны эки жолу полиграфтан (жалганды аныктоочу аппарат) өткөргөнү айтылууда. Бул тесттердин бири 2016-жылы Азия өлкөлөрүнүн биринде, экинчиси 2024-жылдын август айында Европадагы мейманканалардын биринде өткөрүлгөн. Деря эки тесттен тең өткөндөн кийин дагы бир жогорку операциялык деңгээлге көтөрүлгөнү болжолдонууда.
Изилдөөчүлөр шектүүлөрдүн өзгөчө Түркиядан жана башка өлкөлөрдөн алынган SIM-карталардын, модемдердин жана роутерлердин сериялык номерлерин, MAC даректерин жана техникалык мүнөздөмөлөрүн камтыган техникалык маалыматтарды сүрөткө тартып жиберип турушкандарын айтышууда.
