Ирандын аялдар курама командасынын Австралиядан башпаанек сураган бир оюнчусу, командалаштары менен сүйлөшкөндөн кийин чечимин өзгөрткөнү кабарланды. Австралиянын ички иштер министри Тони Берк шаршемби күнү жасаган билдирүүсүндө бул маалыматты ырастады.
Ирандын аялдар футбол командасынын жети мүчөсү беттеш алдында нааразычылык акциясын өткөргөнү үчүн өз өлкөсүндө "чыккынчы" деп аталып, Австралиядан башпаанек сураганы билдирилди.
Команда шейшемби күнү кечинде Сиднейден Куала-Лумпурга жөнөө алдында дагы бир оюнчу жана техникалык топтун бир мүчөсү арыз беришкен. Ушундайча, буга чейин кайрылган беш спортчуга дагы эки киши кошулган.
Берк шаршемби күнү парламентте сүйлөгөн сөзүндө топтон бир кишинин кийинчерээк “командадан чыккан айрым кишилер менен сүйлөшкөнүн жана оюн өзгөрткөнүн” айтты.
Министрдин айтымында, командалаштары ага кеңеш берип, Ирандын элчилиги менен байланышууга үндөшкөн.
Берк мунун натыйжасында Иран элчилигинин оюнчулардын турган жерин билгенин айтты.
Министр ошондой эле калган оюнчулардын коопсуз үйдөн башка жерге алып барылганын билдирди.
Команданын Сиднейден чыгып, шаршемби күнү таңга маал Малайзияга жеткени кабарланды.
Команда менен кошо жүргөн эркек көзөмөлчүлөрдүн башка аялдардын да баш калкалоо талабына тоскоол болушу мүмкүн деген тынчсыздануулардын бар экендиги белгиленди.
Министр Берк Сидней аэропортунда ар бир оюнчу командадан өзүнчө бөлүнүп, чечим кабыл алуусу үчүн аларга атайын убакыт берилгенин айтты.
Оюн өзгөрткөн футболчу тууралуу сөз кылган министр Берк австралиялык бийлик өкүлдөрүнүн «бул чындап эле анын өз каалоосу менен кабыл алынган чечим экенине ишенгенин» кошумчалады.
