АКШнын президенти Дональд Трамп Түркиянын президенти Режеп Таййип Эрдоганга Газада ок атышууну токтотууга жардам бергени үчүн ыраазычылык билдирди.

“Бул мырза Түркия деп аталган жерден келип, дүйнөдөгү эң күчтүү армиялардын бирине ээ. Чынында, анын күчү өзү айтканынан да жогору,” – деди Трамп дүйшөмбү күнү Шарм-эль-Шейхтеги кол коюу аземинде, сол жагында Түркиянын президенти, ал эми оң жагында Египет менен Катар лидерлери турган учурда.

“Ал катуу мүнөздүү адам, бирок менин досум жана качан гана мен ага муктаж болгон учурда ар дайым жанымда болду. Ошондуктан мен Түркиянын президенти Эрдоганга ыраазычылык билдиргим келет,” – деп кошумчалады Трамп.

АКШ президенти Эрдоганды “бизди эч качан жарым жолдо таштап кеткен жок” деп айтып, аны “сонун” деп сыпаттады жана алардын узак убакыттан берки достугу үчүн ыраазычылык билдирди.

Газада ок атышууну токтотуу келишими

Газада ок атышпоо келишиминин биринчи этабы Трамптын эки жылдан бери уланып жаткан Израиль-Газа согушун токтотуу планынын алкагында жума күнү күчүнө кирди.

Дүйшөмбүнүн таңында Хамас менен Израилдин ортосунда туткун алмашуу болду. Бул алмашуунун алкагында жүздөгөн палестиналык туткундар Израилдин белгилүү Офер аскердик түрмөсүнөн жана Негев чөлүндөгү башка түрмө жайларынан бошотулду. Аман калган жыйырма туткун да эркиндикке чыкты.

Трамп барымтада каза болгон туткундардын сөөгүн табуу аракеттери уланып жатканын билдирип: «Алардын кайда экенин билишет, менимче азыр алардын беш-алтоосу аныкталды», - деди.

2023-жылдын октябрынан бери Израилдин чабуулдары Газада 67,800дөн ашуун палестиналыктын өмүрүн алып, бул аймакты жашоого жараксыз абалга алып келди.