Тышкы иштер министри Хакан Фидан Түркия менен Египеттин тарых жана географиянын өздөрүнө жүктөгөн жоопкерчиликти сезүү менен аракеттенген эки улуу мамлекет экенине көңүлдөрдү буруп: «Өлкөлөрүбүздүн ортосундагы кызматташтыктын чыңдалышы элдерибиздин орток кызыкчылыктарына гана эмес; аймагыбызда тынчтыктын, туруктуулуктун жана бакубаттуулуктун орношуна да кызмат кылат. Бул түшүнүк жана президенттерибиздин көрөгөчтүгү менен биргеликте иштөөнү жана мамилелерибизди өз ара ишенимдин жана орток кызыкчылыктарыбыздын негизинде тереңдетүүнү улантабыз», — деди.

Фидан NSosyal баракчасында Египет сапары тууралуу билдирүү жасады.

Сапардын эки өлкөнүн «жогорку деңгээлде» уланып жаткан эки тараптуу кызматташтыгын жана аймактагы абалдарды талкуулоо жагынан абдан маанилүү мүмкүнчүлүк болгонун белгилеген Фидан: «Ачык-айрым меймандостугу үчүн эң оболу урматтуу кесиптешим жана бир тууганым Бадр Абделаттиге жана бардык египеттик жетекчилерге ыраазычылык билдирем», — деди.

Фидан сапар учурунда египеттик кесиптеши Абдулати менен биргеликте Түркия-Египет биргелешкен пландоо тобунун экинчи жыйынына төрагалык кылганын баса белгилеп, буларды кошумчалады: "Ошондой эле Египеттин Башкы чалгындоо кызматынын башчысы Хасан Рашад жана Араб Лигасынын башкы катчысы Набил Фахми менен жолугуштук. Эки тараптуу соодабызды көбөйтө турган, экономикалык мамилелерибизди диверсификациялай турган жана өлкөлөрүбүздүн ортосундагы байланышты бекемдей турган келишимдерге кол койдук",- деди.

Хакан Фидан 13–14-август күндөрү Египетке расмий иш сапары менен барды.