АКШнын президенти Дональд Трамп Түштүк Корея менен кеңири экономикалык жана коргонуу келишимине жетишилгенин жарыялады.
Трамп бейшемби күнү Truth Social платформасында “АКШнын аларга тарифтерин төмөндөтүүсү үчүн Түштүк Корея АКШга 350 миллиард доллар төлөөгө макул болду”, - деди.
Трамп ошондой эле Түштүк Корея АКШдан «ири көлөмдөгү» мунай жана газ сатып алууга макул болгонун жана Түштүк Кореянын компаниялары менен ишкерлеринин АКШдагы инвестициялары 600 миллиард доллардан ашаарын билдирди.
АКШ лидери «Биздин аскердик альянсыбыз мурдагыдан да күчтүү жана ошонун негизинде мен аларга эски, анча ийкемдүү эмес дизелдик суу астында жүрүүчү кемелердин ордуна атомдук суу астында жүрүүчү кеме курууга уруксат бердим», - деп кошумчалады.
Шаршемби күнү Түштүк Кореянын президенти Ли Чжэ-мён менен жолугушуу учурунда Трамп Түштүк Корея менен соода келишими “негизинен аяктап калды” деп билдирген, бирок акыркы келишим боюнча толук макулдашууга жетишилгенин айткан эмес.
