АКШнын түштүк-чыгышындагы Флорида штатында университетте куралдуу кол салуу болуп, эки адам каза тапты, алты киши жараат алды. Полиция кол салган адам жергиликтүү укук коргоо кызматкеринин уулу экенин билдирди.

Флорида штатынын университетинин полиция башчысы Жейсон Трамбоуэр: «Эки жабырлануучу каза болду жана беш адам октон жараат алып, жергиликтүү ооруканаларга жеткирилди», - деп айтып ок чыгарган адам дагы ооруканага жеткирилгенин билдирди.

Флорида штатынын университети Таллахасси шаарынын борборунда жайгашкан жана 40,000ден ашык студент окуйт.

Таллахасси мемориалдык ооруканасынын басма сөз катчысы атышуудан кийин кеминде алты адам ооруканага жеткирилгенин билдирди.

АКШнын президенти Трамп, вице-президент Ж.Д.Вэнс жана жогорку даражалуу аткаминерлер менен бирге Овал кеңсесинен билдирүү жасап, трагедияга кайрылып: «Уят. Мындай нерселердин болуп жатканы коркунучтуу. Бул тууралуу кийинчерээк айта турган сөзүбүз болот»,- деди.

Кандуу кол салуудан кийин курал боюнча жаңы мыйзамдарды каалайсызбы деген суроого Трамп Конституциянын Экинчи Түзөтүүсүн «коргоо милдети» бар экенин айтты. 

Трамп:«Бул окуялар коркунучтуу, бирок мылтык эмес, тетикти адамдар тартат»,-деди.

Флорида губернатору Рон ДеСантис: «Биздин тиленүүлөрүбүз FSU үй-бүлөсү менен... Мамлекеттик укук коргоо органдары жигердүү кийлигишип жатат», - деди.

Университет бардык сабактарды токтотту. Коомчулук башынан өткөргөн шок жана травмадан улам пландаштырылган бардык спорттук иш-чаралар да жокко чыгарылды.

Полициянын айтымында, ок чыгарган адам Флорида штатындагы университетте окуган студент жана ооруканага жеткирилген.

Ошондой эле ок аткан адам Леон округунун шерифинин орун басарынын уулу экени жана анын апасынын мылтыгына ээ болгону кабарланган.

«Бул жашоо үчүн күрөш болду»

Кол салуу маалында тартылган видеолордо окуучулар окуя болгон жерден качуу үчүн тыгында чуркап жүргөнүн көрүүгө болот. Студенттик профсоюздун жанындагы куралдуу кол салуу учурундагы дүрбөлөң камерага түшүп калган.

Атылган октун үнүн уккан студенттер жана чочуп кеткен ата-энелер студенттик бирикменин боулинг аллеясына жашынып, имараттын төмөнкү кабатындагы жүк ташуучу лифтке баш калкалашкан.

 Бейшемби күнү түштө университет активдүү ок атуу эскертүүсүн жарыялагандан кийин, тез жардам, өрт өчүрүүчү унаалар жана бир нече укук коргоо органдарынын патрулдук унаалары штаттын баш калаасынын батышында жайгашкан кампусту көздөй чуркап жөнөштү. Студенттик профсоюздун жанына полиция кийлигишкени кабарланды.

21 жаштагы коммуникация тармагынын студенти Райан Седергрендин айтымында, ал жана башка 30 чакты адам жакын жердеги бардан качып бараткан студенттерди көргөндөн кийин студенттер союзунун төмөнкү кабатындагы боулинг аллеясына жашынышкан.

«Ошол учурда бул аман калуу маселеси болчу»,- деди ал.

Болжол менен 15 мүнөттөн кийин университеттин полициясынын коштоосунда имараттан чыгарылган Седергрен газондо тез жардам кызматы көрсөтүлүп  жаткан адамды көргөнүн айтты.

Крис Пенто Таллахассидеги WCTV телеканалына кампусту кыдырып жүргөндө студенттик союзда эгиздери менен тамактанып жаткан маалда ок атылганын укканын айтты.

«Бул сюрреализм болду. Адамдар күтүлбөгөн жерден чуркай башташты»,-деди ал.

Коридордун аягында жабык эшиктерге жолукканда кызматтык лифтке баш калкалагандарын белгилеген Пенто: «Бул балким эң коркунучтуу учур болчу, анткени эмне болорун билбедик. Андан да жаман болушу мүмкүн эле»,-деди. Лифттин эшиги ачылганда, эки полиция кызматкери мылтыктары менен мээлеп турган.

 Окуядан үч сааттай кийин Флорида штатынын эскертүү системасы укук коргоо органдары «коркунучту жок кылганын» жарыялады. Бийлик элди студенттик биримдиктен жана дагы эле активдүү кылмыш жерлери болуп саналган башка жерлерден алыс болууга үндөдү.

Студенттик профсоюздун алдында ондогон патрулдук унаалар, анын ичинде соттук-медициналык унаа токтоп турган. Кызматкерлер окуя болгон жерди скотч менен курчоого алышкан.

Эвакуация учурунда телефондорун, ачкычтарын жана жеке буюмдарын таштап кетүүгө аргасыз болгон студенттер жана кызматкерлер көлөкөдө күтүп, каза болгондор үчүн дуба кылышты.

Университеттин маалыматы боюнча болжол менен 44,000 студент Флорида мамлекеттик университетинде билим алат.

2014-жылы университеттин башкы китепканасында атышуу болуп, үч адам жаракат алган. Полиция кол салган Мирон Мэйди (31) атып салган.

Университет бейшемби күнү бардык сабактарды жана иш-чараларды жекшембиге чейин токтотту.