Орусия Кашмир боюнча Индия-Пакистан талашын чечүүгө жардам берүүгө даяр экенин билдирди

Орусиянын тышкы иштер министри Сергей Лавров пакистандык кесиптеши менен болгон жолугушуусунда Пакистан менен Индиянын ортосундагы Кашмир чыңалуусун жөнгө салууда Орусиянын жардам берүүнү сунуш кылганы кабарланды.

Тышкы иштер министрлиги Лавровдун Пакистандын вице-премьер-министри Исхак Дар менен жолугушуусуна шилтеме жасап, жекшемби күнкү билдирүүсүндө: «Өзгөчө көңүл Жаңы Дели менен Исламабаддын ортосундагы тирешүүнүн олуттуу курчушуна бурулду», - деп айтылат.

Орусиянын Тышкы иштер министрлигинин Telegram баракчасында жарыяланган билдирүүсүндө «Орусия Исламабад менен Жаңы Делинин өз ара өтүнүчү боюнча 22-апрелде Кашмир өрөөнүнүн Пахалгам аймагындагы теракттан кийин түзүлгөн кырдаалды саясий жактан жөнгө салууга салым кошууга даяр экени баса белгиленди»,-деп айтылды.

Лавровдун Дар менен жолугушуусу Индиянын тышкы иштер министри Субрахманям Жайшанкар менен жолугушуусунан эки күн өткөндөн кийин болуп, анда ал эки коңшу өлкөнүн ортосундагы талаш-тартыштарды чечүүгө чакырды.

Кашмир өрөөнүндөгү тоолуу туристтик аймак Пахалгамда өткөн аптада белгисиз куралчан адамдардын кол салуусунан кеминде 26 адам набыт болгон.

Мусулмандардын басымдуу бөлүгүн түзгөн Кашмир эки өлкө тең ээлеген аймак жана буга чейин бир нече согуштун, козголоңдордун жана дипломатиялык туңгуюктардын сахнасы болгон.

Орусия ондогон жылдар бою Индиянын эң ири курал-жарак жеткирүүчүсү болуп келген жана Жаңы Дели менен Москванын ортосундагы тыгыз байланыш СССРден бери эле пайда болгон.

Кашмир талашы

Пахалгам чабуулунан кийин эки тарап тең жооп кайтаруу чараларын көрүштү.

Индия Пакистан менен суу бөлүшүү боюнча Инд суу келишимин токтотту жана анын жалгыз иштеген кургактык чек арасын жапты. Ал жекшембиден тарта пакистандык жарандарга берилген визаларды жокко чыгарды.

Буга жооп кылып Пакистан Индия жарандары үчүн визаларды жокко чыгарып, Индиянын авиакомпаниялары үчүн аба мейкиндигин жаап, коңшу өлкө менен соодасын токтотуп, Индия менен болгон Симла келишимин токтотту. Бул 1972-жылкы келишим тынчтыкты орнотууга жана Кашмир талашына өзгөчө көңүл буруп эки тараптуу маселелерди чечүүгө багытталган.

Индия менен Пакистан 1947-жылы Британиянын колониялык башкаруусунан көз карандысыздыкка ээ болгондон бери мурдагы княздык аймак үчүн согушуп келишет. Чек ара бир канча муундан бери үй-бүлөлөрдү бөлүп-жарып келет.

 Индия көзөмөлдөгөн аймактагы козголоңчулар 1989-жылдан бери эгемендүүлүктү же Пакистан менен биригүүнү талап кылып, козголоң уюштуруп келишет.

Жаңы Дели 500 000дей аскерин Индия башкарган Кашмирге жайгаштырды.

Акыркы жумаларда Моди өкмөтү мусулман уюмдарына, басылмаларына жана мектептерине каршы репрессиясын күчөттү; Бул кырдаал бүткүл региондо баш аламандыкка алып келди.

Ошол эле учурда Индия талаштуу аймактагы 82 000 кашмирлик эместерге жашаган жери тууралуу күбөлүк берди; Бул атайылап демографиялык өзгөртүүлөр тууралуу кооптонууну жаратты.

Пахалгамдагы чабуулдан кийин Индия башкарган Кашмирде 1500дөн ашуун киши камакка алынды.

Ошол эле учурда Индиянын ар кайсы шаарларында индус улутчул топтору кашмирлик мусулмандарга, негизинен студенттерге кол салганы тууралуу кабарлар пайда болду.