Сауд Арабиясы жана Катар Сириянын Дүйнөлүк Банкка болгон 15 миллион долларлык карызын төлөп берерин билдиришти.

Жекшемби күнү эки өлкө биргелешкен билдирүү жасап, Сириянын Дүйнөлүк Банкка болгон карызын жабуу өлкөнүн калыбына келүү процессин тездетүүгө жардам берерин белгилешти.

«Бул кадам Сирияга жакынкы убакта маанилүү тармактарды өнүктүрүү үчүн каржылык колдоо алууга жол ачат. Ошондой эле, мекемелерди кайра куруу, мүмкүнчүлүктөрдү өнүктүрүү жана саясатты иштеп чыгуу менен реформаларды жүргүзүүгө техникалык жардам көрсөтөт», – деп айтылат билдирүүдө.

Эки өлкө эл аралык жана аймактык каржылык мекемелерди Сирияда өнүгүү иштерин тез арада кайра баштоого жана кеңейтүүгө, өз ара аракеттенүүгө жана сириялык боордош элдин жаркын келечекке болгон үмүттөрүн ишке ашырууга көмөктөшүүгө чакырышты.

Өтмө башкаруу

Сириянын борбордук банкынын башчысы жана каржы министри ушул жумада 20 жылдан ашык убакыттан кийин биринчи жолу Эл аралык Валюта Фонду (ЭВФ) жана Дүйнөлүк Банктын жазгы жыйындарына катышты.

Бейшемби күнү ЭВФтин директору Кристалина Георгиева ЭВФ Сириянын мекемелерин кайра курууга жана аны дүйнөлүк экономикага интеграциялоого жардам берүүнү пландап жатканын билдирди.

Сирияны 25 жылга жакын башкарган Башар Асад декабрь айында Орусияга качып, 1963-жылдан бери бийликте турган Баас партиясынын доору аяктады.

Январь айынын аягында өтмө башкаруу түзүлүп, конституция, куралдуу топтор, парламент жана Баас партиясы таратылган.