Кытай жума күнү Ооганстан менен Пакистанды ок атышууну токтотууга чакырды жана Пекинди "терең тынчсыздандырган" зордук-зомбулукту токтотуу үчүн эки тарап менен тең сүйлөшүп жатканын билдирди.
Пакистан Кытайдын аймактагы эң жакын өнөктөштөрүнүн бири, бирок Пекин өзүн Ооганстанга "дос кошуна өлкө" деп да атайт.
Тышкы иштер министрлигинин басма сөз катчысы Мао Нин Пакистан жума күнү Ооганстандын борбор калаасы Кабул менен катар ири шаарларын бомбалагандан кийин Кытайдын "жаңжалдын күчөшүнө" терең тынчсызданып жатканын маалымдады.
"Кытай эки тарапты тең сабырдуулукка жана тынчтанууга... мүмкүн болушунча тезирээк ок атышууну токтотууга жана андан ары кан төгүүгө жол бербөөгө чакырат", - деди Мао Нин басма сөз жыйынында.
Катчы: "Кытай Пакистан менен Ооганстандын ортосундагы жаңжалга өз каналдары аркылуу дайыма ортомчулук кылып келген жана чыңалууну басаңдатуудагы конструктивдүү ролду ойноону улантууга даяр. Министрлик жана Кытайдын Пакистан менен Ооганстандагы элчиликтери бул маселе боюнча тиешелүү тараптар менен иштешип жатышат"деп кошумчалады.
"Ачык согуш"
Пакистандын акыркы чабуулдары бейшемби күнү кечинде ооган күчтөрү Исламабаддын мурунку аба соккуларына жооп катары Пакистандын чек ара аскерлерине кол салгандан кийин болду.
Исламабаддын коргоо министри коңшу өлкөлөрдүн ортосунда "ачык согуш" башталганын жарыялады.
Кытай Пекиндин эл аралык "Бир алкак, бир жол" демилгесинин бир бөлүгү болгон ири транспорт, энергетика жана инфраструктуралык долбоорлорду каржылоо үчүн Пакистанга ондогон миллиарддаган долларларды берген.
Исламабад май айындагы кыска мөөнөттүү кагылышуу учурунда Индияга каршы көптөгөн учактар менен катар Кытай өндүрүшүндөгү аскердик жабдууларды колдонгон.
Басма сөз катчы Мао жума күнү Кытай эки өлкөдөн тең кытай жарандарынын, долбоорлорунун жана мекемелеринин коопсуздугун камсыз кылууну талап кылганын, кырдаалды кылдат көзөмөлдөп жатканын жана муктаж болгон жарандарына жардам берерин билдирди.
