Стамбул Башкы прокуратурасы, Израилдин эл аралык сууларда Глобалдык Сумуд флотилиясына кол салуусунда 24 түрк жаранынын камакка алынышына байланыштуу тергөө иштерин баштады.
Стамбул Башкы прокуратурасы бейшемби күнү билдирүү жасап, гуманитардык жардам жеткирүү максатында Газага багыт алган Глобалдык Сумуд флотилиясына Израилдин деңиз күчтөрү эл аралык сууларда кол салгандан кийин 24 түрк жаранынын камакка алынышы боюнча тергөө башталганын жарыялады.
Бул тергөө "эркиндикти чектөө, транспорт каражаттарын талкалоо же тартып алуу, талап-тоноо, мүлккө зыян келтирүү, кыйноо кылмыштары менен БУУнун Деңиз укугу боюнча конвенциясынын жоболоруна, Кылмыш-жаза процессуалдык кодексинин 15-беренесиндеги юрисдикция эрежелерине жана Түркиянын Кылмыш-жаза кодексинин 12 жана 13-беренелериндеги кызмат эрежелерине ылайык жүргүзүлүүдө.
223 эл аралык активист камакка алынды
Уюштуруучулардын бейшемби күнкү билдирүүсүнө караганда, Газага жардам алып бара жаткан кербендеги жалпысынан 223 эл аралык активист Израиль аскерлери тарабынан камакка алынды.
Глобалдык Сумуд флотилиясы, шаршембиге караган түнү 15 кемеге израилдик күчтөр тарабынан кол салуу жасалганын тастыктады жана дагы сегизи кол салууга дуушар болушу мүмкүн же кол салуу астында турат деп билдирди.
Флотилия кол салууга кабылган кемелердеги 223 активисттин ысымдарын жана улуттарын Instagram аркылуу бөлүштү. Ошол эле учурда расмий флотилия трекери 20 кеменин кол салууга кабылганын, 24 кеменин болсо Газага жолун улантып жатканын көрсөттү.
Израиль 18 жылдан бери 2,4 миллион калкы бар Газаны курчоодо кармап келет жана март айында чек ара өткөрмө пункттарын жаап, азык-түлүк жана дары-дармек жеткирүүнү токтоткон. Бул абал аймакты ачарчылыкка түрттү.
2023-жылдын октябрынан бери Израилдин бомбалоосунан 66 миңден ашуун палестиналык, алардын көбү аялдар жана балдар каза тапты. БУУ жана укук коргоо уюмдары аймак жашоого жараксыз болуп бара жатканын, ачарчылык жана оорулар тез жайылып жатканын бир нече жолу эскертишкен.
