Британиянын MI5 чалгындоо агенттигинин "Кытайдын тыңчылык коркунучтары" тууралуу эскертүүсүнөн кийин, Кытай Британияны катуу сынга алып:"Бул ойдон чыгарылган дооматтар жана жалган божомолдор токтотулушу керек",- деп билдирди.
Пресс-конференциянын протоколдоруна ылайык, Кытайдын Тышкы иштер министрлигинин өкүлү Мао Нин шаршемби күнкү пресс-конференцияда Пекиндин "эч качан башка өлкөлөрдүн ички иштерине кийлигишпегенин жана Улуу Британиянын парламентине байланыштуу "чалгындоо маалыматтарына" эч кандай тиешеси жок экенин" билдирди.
Британиянын коопсуздук боюнча министри Дэн Жарвис шейшемби күнү MI5 парламентке тыңчылык боюнча эскертүү жөнөткөндөн кийин, Британиянын демократиясына кийлигишкен "Кытайдын тыңчылык коркунучтары" жөнүндө эскертти.
Жарвис Пекин парламент жөнүндөгү купуя маалыматты алуу максатында депутаттар жана лорддор менен байланышууга аракет кылганын айтып:"Бул 2021-жылы Кытай мамлекетине тиешелүү актерлордун парламенттин электрондук почталарын бутага алган кибер операцияларына, 2022-жылы Кристин Линин чет элдик кийлигишүү аракеттерине жана Кытайдын башка жакынкы учурдагы иш-аракеттеринин үлгүсүнө негизделген" деди.
Жарвис өкмөттүн улуттук кызыкчылыктарды, жарандарды жана демократиялык жашоо образын коргоо үчүн зарыл болгон бардык чараларды көрөрүн билдирди.
Бирок, коопсуздук министри өкмөттүн Кытайдын Россия жана Иран менен бирге Чет өлкөлүк таасирди каттоо системасынын (FIRS) Өркүндөтүлгөн деңгээлине кошулабы же жокпу, азырынча чечим кабыл ала электигин билдирди. Бул система чет элдик күчтүн атынан Британияда саясий таасир этүү ишмердүүлүгүн жүргүзүү боюнча түзүлгөн келишимдерди каттоодон өткөрүүнү талап кылат.
