ПКК террордук уюмунун мүчөлөрү Анкаранын «Террорсуз Түркия» максатынын негизинде жума күнү Ирактын Сулеймания облусунда куралдарын таштай баштады.

Түрк коопсуздук күчтөрүнүн туруктуу жана натыйжалуу антитеррордук операцияларынын натыйжасында, ПКК май айында өзүн таркатуу жана куралсыздануу чечимин жарыялаган. Бул Түркиянын террор менен күрөшүүдө ондогон жылдык күрөшүндө абдан маанилүү бурулуш жери катары каралууда.

Түрк мамлекети террорго каршы күрөшүн дипломатиялык чөйрөгө да жайылтып, өзгөчө Европа жана Жакынкы Чыгыштагы эл аралык өнөктөштөрүнө көп жылдар бою туруктуу кысым көрсөтүүсү натыйжа берди. ПККнын чет элдик борборлордо эркин иш жүргүзүүсү, акча адалдоосу жана ар кандай саясий шылтактар менен каражат топтоо мүмкүнчүлүгү чектелди. Түркиянын геосаясий таасиринин күчөшү да өлкөнүн тынчсызданууларынын дүйнөлүк державалар тарабынан олуттуу кабыл алынышына шарт түздү.

Экономикалык байланыштар, энергетикалык дипломатия жана аймактык өнөктөштүктөр аркылуу Анкара чет өлкөлөрдөгү ПККнын колдоо тармактарын акырындык менен алсыратты.

Адилеттик жана өнүгүү партиясынын (АК партия) катчысы Өмер Челик шаршемби күнү кечинде жасаган билдирүүсүндө куралдарды тапшыруу процесси бир нече айдын ичинде аякташы керектигин билдирди.

Өмер Челик NTV телеканалына берген маегинде Улуттук Чалгындоо Уюму жана түрк куралдуу күчтөрүнүн элементтеринен турган механизмдин куралсыздануу процессин көзөмөлдөй турганын айтып : “(Иракта) куралдарды таштоо процесси 3 - 5 айдан аша турган болсо ар кандай чагымчылдыктарга дуушар болушу мүмкүн”,- деди.

Түркия 40 жылдан ашуун убакыттан бери карапайым калкка жана түрк коопсуздук күчтөрүнө кол салуулар аркылуу 40 миңден ашуун адамдын өмүрүн алган ПКК менен күрөшүп келет.