Түркиянын Тышкы иштер министрлиги Израилдин Газага жасаган чабуулдары ушул айдын башында жетишилген ок атышууну токтотуу келишимин ачыктан-ачык бузуу болуп саналат деп билдирди.
Шейшемби күнү жарыяланган билдирүүсүндө министрлик жайкын тургундардын арасында курмандыктар тууралуу маалыматтарга терең тынчсыздануусун билдирип, узак мөөнөттүү тынчтыкка болгон үмүттү сактап калуу жана аймактык коопсуздукту орнотуу үчүн ок атышууну толук сактоого чакырыгын кайталады.
Билдирүүдө Тель-Авив администрациясы «ок атышууну токтотуунун шарттарын сактоого жана тынчтыкты жана туруктуулукту буза турган ар кандай кадамдардан алыс болууга» чакырылган.
Министрлик ошондой эле Түркия Палестина эли менен тилектештигин сактап, аймакта адилеттүү, узак мөөнөттүү жана ар тараптуу тынчтыкка жетүү аракеттерин колдоону уланта берерин баса белгиледи.
Ок атышууну токтотууну бузууга берилген буйрук
Израиль армиясы шейшемби күнү геноцидчи Биньямин Нетаньяхунун «тезинен күчтүү чабуулдарды баштоо» буйругунан кийин Газага бир катар абадан соккуларын жасады. Нетаньяху ХАМАСты ок атышууну токтотууну бузду деп айыптады, бирок бул айыптоого эч кандай далил келтирген жок.
Чабуулдарда кеминде 63 палестиналык жайкын тургун, анын ичинде 24 бала каза болуп, дагы көптөгөн адамдар жаракат алышты.
АКШнын президенти Дональд Трамптын ортомчулугу менен түзүлгөн 20 пункттан турган пландын алкагында түзүлгөн ок атышууну токтотуу келишими 10-октябрдан бери күчүндө болчу. План палестиналык туткундарды бошотууну жана израилдик туткундарды бошотуунун ордуна Газаны кайра курууну карайт.
Бирок, 2023-жылдын октябрынан бери Израилдин чабуулдарынан болжол менен 69 000 адам, көбүнчө аялдар жана балдар каза болуп, 170 500дөн ашуун адам жаракат алган.
Израилдин бомбалоосу Газа тилкесинин көпчүлүк бөлүгүнүн таш-талканын чыгарып, дээрлик бүтүндөй калкты жер которууга мажбур кылган.
