Америкалык режиссёр Роб Райнер жубайы Мишель Сингер Райнер менен Түштүк Калифорниядагы сарайында өлүк табылды. Бул тууралуу жекшемби күнү CNN жана NBC каналдары кабарлашты.
Лос-Анжелес полиция департаменти жекшемби күнү кечинде өткөргөн басма сөз жыйынында үйдөн табылган эки адамдын ким экенин расмий түрдө тастыктай электигин жана тергөө жүрүп жатканын билдирди.
Тергөөгө жакын полиция кызматкери каза болгондор Роб Райнер жана Мишель Сингер Райнер экенин тастыктады. Кызматкер тергөө иштеринин купуялуулугуна байланыштуу маалымат бере албасын жана Associated Press агенттигине атын жашыруу шарты менен маалымат бергенин айтты.
Лос-Анжелес полиция департаментинин капитаны Майк Блэнд окуя тууралуу "киши өлтүрүү ыктымалы" катары каралып жатканын билдирди. Лос-Анджелес өрт өчүрүү департаменти болсо саат 15:30 чамасында дарекке медициналык жардам чакыруусу боюнча топ жөнөтүлгөнүн кабарлады.
78 жаштагы Роб Райнер 1970-жылдары чыккан жана ошол мезгилдин эң көрүнүктүү чыгармаларынын бири катары таанылган "All in the Family" сериалында ойногон Майкл "Meathead" Стивич ролу менен актёр катары атактуулукка жеткен. Кийинчерээк Райнер режиссёрлук карьерасында "The Princess Bride", "When Harry Met Sally…" жана "This Is Spinal Tap" сыяктуу тасмалар менен өз муунунун алдыңкы кинорежиссёрлорунун бирине айланган.
