Тышкы иштер министрлигинин билдирүүсүндө, Түркиянын Сириянын түштүгүндөгү акыркы кагылышууга Израилдин аскерий кийлигишүүсүн айыптаганы жана кол салууларды тез арада токтотууга чакырганы айтылды.

«Израилдин Сириянын түштүгүндөгү акыркы окуяларга аскерий күч менен кийлигишүүсүн айыптайбыз жана бул кол салуулардын дароо токтотулушу керектигине басым жасайбыз»,-деген билдирүү шейшемби күнү жарыяланды.

Билдирүүдө Сирияда ырааттуулук жана коопсуздуктун сакталышы биринчи кезекте Сирия элинин, ошондой эле коңшу өлкөлөрдүн жана кеңири аймактын кызыкчылыгында экени баса белгиленди.

“Ушул алкакта Сирия өкмөтүнүн коопсуздукту орнотуу жана өлкөнүн бардык аймагындагы катышуусун бекемдөө кадамдары колдоого алынышы керек”,- деп айтылды.

Аймактык суверенитетти бузуу

Сириянын аскерлери Сүвейдада тартипти орнотуу максатында аймакка киргенден кийин Израиль өлкөнүн аймактык суверенитетин бузуп Сириянын түштүгүнө абадан сокку урду.

Сириянын коргоо министри шейшемби күнү жергиликтүү коомчулуктун лидерлери менен сүйлөшүүлөрдөн кийин Сүвейда провинциясында ок атышууну токтотууну жарыялагандан көп өтпөй Израиль чабуулдарын ишке ашырды.

Сириянын коргоо министри өз билдирүүсүндө: «Шаарда кызмат кылган бардык бөлүктөргө кайрылам: Сүвейданын алдыңкы ишмерлери жана пикир лидерлери менен жетишилген макулдашуудан кийин шаарда толук ок атышпоо жарыяланды»,-деди.

Бирок Сирия күчтөрү “мыйзамсыз топтордун” ар кандай кол салуу же ок атууларына дароо жооп кайтарары айтылды.