Мамлекеттик электр тармактарынын оператору ишемби күнү берген билдирүүсүндө орус аскерлеринин Украинанын энергетикалык инфраструктурасына жасаган «чоң чабуулу» өлкө боюнча электр энергиясынын өчүшүнө алып келгенин маалымдады.
Россия дээрлик төрт жылдан бери уланып жаткан согушту токтотуу үчүн эки өлкөнүн ортосунда АКШнын ортомчулугунда өтүп жаткан сүйлөшүүлөргө карабастан, акыркы күндөрү Украинаны басып алуу үчүн жасаган чабуулдарын улантты.
Украиналык жетекчилер Москваны энергетикалык инфраструктураны атайылап бутага алуу менен айыптап, нөлдөн төмөн температурада жүз миңдеген адам пайдаланган жарык жана жылытуу кызматтарынын үзгүлтүккө учурашына себеп болгонун белгилешти.
Украинанын премьер-министри Денис Шмыгаль Россиянын Украинанын батышындагы Бурштын жана Добротвор энергия станцияларына кол салгандан кийин, Киевдин Польшадан шашылыш жардам сураганын айтты.
Электр тармактарынын оператору "Укрэнерго" ишемби күнү: "Россия Украинанын электр тармактарынын объектилерине каршы кезектеги чоң чабуулун ишке ашырууда", — деп билдирди.
Телеграм аркылуу берилген маалыматта : “Душман келтирген зыянга байланыштуу көпчүлүк аймактарда электр энергиясы чукул түрдө өчүрүлдү. Чабуул азыркы учурда да улантылууда. Коопсуздук абал мүмкүндүк бергенде калыбына келтирүү иштери башталат», — деп кошумчалады.
Украина менен Россия январь айынан бери Абу-Дабиде АКШнын ортомчулугунда менен эки айлампа сүйлөшүү өткөрүштү.
Киев менен Москва туткун алмашуу боюнча макулдашты, бирок сүйлөшүүлөрдөгү эң маанилүү маселелердин бири болгон аймактык (жер) маселесинде эч кандай жылыш болгон жок.
Москва жума күнү Россиянын борбор шаарындагы жогорку мартабалуу аскердик чалгындоо генералынын жараланышына себеп болгон окуянын Украина тарабынан уюштурулгандыгын айтты. Киев бул маселе боюнча комментарий бере элек.
