Украинанын президенти Владимир Зеленский Орусиянын түн ичинде Киевге чабуулунда Түндүк Кореяда өндүрүлгөн баллистикалык ракетаны колдонгонун билдирди. Бул чабуулдан 12 адам каза болуп, 90 адам жаракат алды.

“Алдын ала маалыматтарга караганда, орустар Түндүк Кореяда өндүрүлгөн баллистикалык ракетаны колдонушту. Биздин атайын кызматтар бардык маалыматтарды тактап жатат,” – деген Зеленский Түштүк Африкадагы мамлекеттик сапары учурунда X платформасында билдирүү жасады.

Эгер бул маалымат тастыкталса, мындай ракета колдонуу Орусия менен Пхеньяндын ортосундагы “криминалдык мүнөздөгү кызматташтыкты” көрсөтөрүн эскертти.

Буга чейин Украина Киевге карай орус ракеталык чабуулунан 10 адам каза болуп, 90 адам жаракат алганын кабарлаган, бирок кийин урандылардын арасынан дагы эки адамдын сөөгү табылган.

“Куткаруучулар Святошинский районундагы урандылардын арасынан дагы эки адамдын сөөгүн табышты. Азыркы учурда каза болгондордун саны 12ге жетти,” – деп Киев шаарынын аскердик администрациясынын башчысы Тимур Ткаченко Telegram аркылуу билдирди.

Ткаченко ошондой эле чабуулдан 90 адамдын ар кандай деңгээлде жаракат алганын, алардын ичинен 12си балдар экенин кошумчалады.

Киевдин Голосеевский, Шевченковский, Соломенский, Оболонский жана Деснянский райондору дагы жабыркаганын белгиледи.

Украинанын аба күчтөрү түнкү чабуулда Орусия тарабынан атылган 70 ракетанын 48ин жана 145 дрондун 64үн абадан коргонуу системалары менен атып түшүргөнүн маалымдады.

Трамп Путинге чабуулдарды токтотуу чакырыгын салды

Ал арада президент Дональд Трамп орус лидери Владимир Путинди Украинага кол салууларды токтотууга чакырды. Бул анын Орусиянын лидерин сындаган сейрек учурларынын бири болду.

АКШ президентинин Путинге түз кайрылуусу, Зеленский союздаштарынан Орусияга көбүрөөк кысым көрсөтүүнү жана басып алууну токтотууну сурангандан кийин болду.

Орус кол салууларын жактырбаганын айткан Трамп социалдык тармактардагы билдирүүсүндө: “Бул керексиз кол салуу. Владимир, ТОКТОТ!” деди.