АКШнын Мамлекеттик катчысы Марко Рубио союздаштардын АКШ жана Израилдин Иранга багытталган согушун колдоого кызыкдар эместигине нааразычылыгын билдирип, Иран согушунан кийин Вашингтон НАТО альянсынын баалуулугун кайрадан карап чыгышы мүмкүн экенин айтты.
Рубио FOX News каналына берген маегинде: "Биз НАТОнун жана альянстын өлкөбүз үчүн баалуулугун кайра карап чыгышыбыз керек болот", - деди жана акыркы чечимди президенттин чыгарарын кошумчалады.
НАТОдогу союздаштарын АКШнын аскердик базаларын колдонуу талаптарын четке кагышкандыгы үчүн сынга алган Мамлекеттик катчы: «Биз алардан абадан сокку урууну суранган жокпуз. Алардын базаларын колдонууга уруксат керек болгондо, алардын жообу 'Жок' болууда. Анда биз эмне үчүн НАТОдобуз?» — деген билдирүү жасады.
Европадан четке кагуулар
Көптөн бери өзүнүн «НАТОнун эң күчтүү коргоочуларынын бири» экенин айткан Рубио, альянс АКШга Европадагы базалары аркылуу дүйнөлүк деңгээлде күч көрсөтүүгө мүмкүндүк берерин белгиледи.
Муну менен бирге, альянстын «бир тараптуу жолго» айлануу коркунучу бар экенин эскерткен Рубио: «Бизге керек болгондо бул базаларды колдонууга уруксат берилбесе, анда эмне үчүн аймакта... ушунча америкалык күчтөр жайгаштырылган?» — деген суроо узатты.
Мамлекеттик катчы бул сөздөрдү европалык айрым союздаштарынын Иран согушуна байланыштуу АКШнын талаптарын четке кагышы же чектөөсү боюнча айтты
Италия АКШнын Сицилиядагы аскердик базасына учактарын кондуруу талабын четке какса, Испания да өз базаларын же аба мейкиндигин колдонууга уруксат берген эмес.
Улуу Британия, Франция жана Германия сыяктуу башка союздаштар өз ролдорун коргонуу багытындагы колдоо менен гана чектеп, чыңалууну азайтууга чакырышкан.
