Тышкы иштер министри Хакан Фидан менчик телеканалда учурдагы маселелер боюнча суроолорго жооп берди.
Фидан АКШ менен болгон карым - катнаштардын жылдар бою өйдө-ылдый болуп келгенин, бирок соода, экономика, эл аралык карым - катнаштар, билим берүү жана технология абдан жакшы өнүккөнүн белгиледи.
Фидан: "Айрыкча геосаясий маселелерге келсек... Обаманын администрациясы учурунда башталган Американын Сириядагы саясатынын өзгөрүшү, Башар Асадга жана режимине каршы күрөштөн ДЕАШка каршы күрөшкө өтүү жана YPGны колдоо Түркиянын улуттук коопсуздугуна коркунуч келтирген саясатты түзгөн. Трамптын экинчи мөөнөтүндө бул саясат расмий түрдө токтотулду", - деп мунун эки өлкөнүн ортосундагы эң чоң чыр - чатактарды жок кылганын баса белгиледи.
Фидан Түркиянын аң-сезимдүү тандоолорду жасап, өз максаттарына ылайык сүйлөшүүлөргө катышаарын баса белгилеп, АКШ Конгресси аркылуу CAATSA сыяктуу чечилбеген маселелер бар экенин белгиледи.
«Түркияга байланыштуу конкреттүү чечимдер мезгил-мезгили менен кабыл алынышы мүмкүн болсо да, учурда узакка созулган институционалдык мааниге ээ болгон, тынчсыздандырган маселе - бул CAATSA санкциялары», - деген Фидан, акыркы 3-4 жылда көптөгөн өлкөлөр Түркияга каршы санкцияларын жойгонун айтты.
Хакан Фидан бул санкциялардын көпчүлүгү «мыйзамдуу эмес, административдик» экенин айтып:
«Биз бул жагынан да зарыл болгон кадамдарды таштап жатабыз. Анткени биздин президентте да, Трампта да аларды жоюу боюнча күчтүү эрк бар. Эки лидер өткөн жылдын сентябрь айында Вашингтондо жолукканда, бул маселе боюнча өз эрктерин билдиришкен жана биз, министрлер, бул маселени чечүүгө тапшырма алдык. Коргоо министрибиз жана мен бул боюнча интенсивдүү иштеп жатабыз. Бирок жалпысынан карым - катнаштар жакшы жүрүп жатат».
CAATSA санкциялары алынып салынабы же жокпу деген суроого Фидан: «Белгилүү бир кадамдар бар. Бул багытта тынымсыз аракеттер жүрүп жатат. Булар ишке ашырылган сайын коомчулук муну көрөт», - деди.
Фидан мунун жакынкы аралыкта болушу мүмкүн экенин билдирип: "Анткени Конгрессте процедуралардын аякташы жана юридикалык процесстин аякташы үчүн кеткен убакыт дайыма эле бирдей боло бербейт. Бирок административдик жактан алганда, администрациялардын эрки жагынан эч кандай көйгөй жок. Бирок Америка Конгрессинде процесс кандай болорун көрөбүз",- деди.
