Польша менен Румыния акыркы айларда НАТОнун аба мейкиндигине жасалган жана альянстын коргонуусундагы боштуктарды ачыкка чыгарган учкучсуз учуучу аппараттардын (УУА) эреже бузууларына каршы жаңы курал системасын жайгаштырууда. Бул эреже бузууларды Россиянын жасап жаткандыгы айтылууда.

Кремль Европанын ар кайсы борбор шаарларынын үстүнөн учкан белгисиз учкучсуз учуучу аппараттардын артында тургандыгы тууралуу айыптоолорду бир нече жолу четке какты.

Америкада жасалган Merops системасы орточо пикап жүк ташуучу унаанын артына бата тургандай кичинекей түзүлүшкө ээ. Система учкучсуз учуучу аппараттарды аныктай алат жана жасалма интеллектти колдонуу менен спутниктик жана электрондук байланыштар үзгүлтүккө учураган учурда дагы бутага жете алат.

Merops Польша жана Румынияда гана эмес, Данияда да колдонулат. НАТО аскердик жетекчилери Associated Press агенттигине бул системанын альянстын чыгыш жагындагы коргонууну бекемдөө максатында жайгаштырылгандыгын билдирди.

Жетекчилер бул кадамдын Россия менен чек араны күчтүү куралдандырууну максат кылганын, ушундайча Москванын чек арадан өтүүнү ойлобой тургандыгын белгилешти.

Мындай технологияга болгон муктаждык сентябрь айынын башында болжол менен 20 орус дронунун Польшанын аба мейкиндигине кириши менен белгилүү болду. Кымбат баалуу учактар он миңдеген долларлык дрондорго жооп кайтаруу үчүн учту.

Румыния да дрондордун чабуулуна кабылды. Копенгаген, Мюнхен, Берлин жана Брюсселдеги аэропорттор убактылуу жабылды. Бельгия менен Даниядагы аскердик базалардын жакынында да дрондор байкалды.

Дрондордун булагы ар дайым Россияга же Украинадагы согушка байланыштуу болбосо да коргонууну бекемдөө зарылдыгы ачык. Көпкө созулган дрон согушу же Украинадагыдай толук масштабдуу согуш Батыштын каржылык ресурстарын жана чектелген ракеталык запастарын жок кылышы мүмкүн.

НАТОнун Кургактык командирлигинин операциялар боюнча башкы штабынын башчысынын орун басары полковник Марк Маклеллан: "Бул система бизге өтө так аныктоо мүмкүнчүлүгүн берет. Ал учкучсуз учуучу аппараттарды бутага ала алат жана аларды арзан баада жок кыла алат. Учкучсуз учуучу аппаратты жок кылуу үчүн F-35ти учуруп, ракета менен атуу алда канча арзан", - деди.

Учкучсуз учуучу аппараттарбы, кушпу же учакпы?

Учкучсуз учуучу аппараттар жапыз жана жай учушкандыктан, аларды жогорку ылдамдыктагы ракеталарды аныктоого калибрленген радар системаларында табуу кыйын. Андан тышкары, аларды куштар же учактар менен чаташтырып алууга болот.

НАТОнун расмий өкүлдөрү Меrops системасы бул боштуктарды толтураарын билдиришти.

Маклеллан:«Merops негизинен учкучсуз учуучу аппараттарга каршы учкучсуз учуучу аппараттарды учурат», - деп системанын душмандын учкучсуз учуучу аппаратын түздөн түз ата аларын же системадан келген маалыматтарды кургактыкка же аба күчтөрүнө билдирип учкучсуз учуучу аппараттарды жок кыла аларын белгиледи.

НАТОнун Кургактагы аскердик командирлигинин операциялар боюнча башкы жардамчысы, бригадир генерал Томас Ловин: "Мerops командирлерге коркунучту карап чыгуу жана ок атуу же атпоо боюнча чечим чыгаруусуна белгилүү бир убакыт берет", - деди.

Ловин системанын аэропорттор сыяктуу маанилүү инфраструктураны жана согуш талаасында иштеп жаткан куралдуу күчтөрдү коргоо үчүн колдонулушу мүмкүн экенин кошумчалады.