Улуттук Коргоо министрлиги дүйшөмбү күнү Ирактын түндүгүндө жүргүзүлгөн издөө операциясында 12 түрк аскеринин метан газына кабылып шейит болгонун жарыялады.
Окуя жекшемби күнү ПКК террордук уюм мүчөлөрү баш калкалаган 852 метр бийиктиктеги Чеңгел-Кулпу операциясы аймагындагы үңкүрдө жүргүзүлгөн издөө-тинтүү операциясында болгон.
2022-жылы ПКК террористтери тарабынан шейит кылынган бир аскердин сөөгүн издөөнүн алкагында жүргүзүлгөн операцияда газдан 19 кызматкер жабыркап, 4 киши каза болуп, жалпы шейит саны 12ге жетти.
Министр Яшар Гүлер жогорку даражалуу аскер командирлери менен аймакка барып иликтөө жүргүздү жана шейиттер менен коштошуу зыйнатына да катышты.
Министрликтин билдирүүсүндө : «Ушул окуядан улам кымбаттуу шейиттерибизге дагы бир жолу Аллахтан ырайым тилеп, каза болгондордун үй-бүлөлөрүнө, Түрк куралдуу күчтөрүбүзгө жана асыл улутубузга көңүл айтып, сабыр тилейм»,-деп айтылды.
Түркия, АКШ жана ЕБ тарабынан террордук уюм деп табылган ПКК 40 жылдан ашуун убакыттан бери Түркияга каршы кандуу козголоң жүргүзүп келет.
Түркия бул коркунучтарга жооп иретинде 2022-жылы Ирактын түндүгүндөгү Метина, Зап жана Авашин-Басян аймактарындагы ПККнын баш калкалоочу жайларын бутага алган «Чеңгел-Кулпу» операциясын баштаган.
ПКК Түндүк Иракты Түркияга чек ара чабуулдарын пландоо жана ишке ашыруу үчүн көбүнчө база катары колдонот.
Түрк расмийлери Анкаранын аракеттери БУУнун Уставынын 51-беренесине ылайык келерин жана куралдуу кол салуу болгон учурда өзүн-өзү коргоо укугун пайдаланып жатканын бир нече жолу баса белгилешкен.
Кошумчалай кетсек, Түркия менен Ирактын ортосундагы эки тараптуу келишимдер Түркияга Ирак аймагында терроризмге каршы операцияларды жүргүзүүгө мүмкүндүк берет.
