Орусия Украинанын түндүк-чыгышындагы Сумы аймагындагы Басивка айылын басып алганын жана аймактагы бир катар калктуу конуштардагы украин аскерлерин бутага алганын жарыялады.

Орусия-Украина согушунан эки жылдан ашык убакыт өткөндөн кийин, Киев 2023-жылдын августунда Орусиянын Курск облусуна чек ара аркылуу миңдеген аскерлерин жөнөткөн. Бирок орустардын акыркы айлардагы чабуулдары украин аскерлеринин негизги бөлүгүн Курсктан сүрүп чыгарды.

Орус президенти Владимир Путин чек арага буфердик зонаны түзүү керектигин бир нече жолу билдирген.

Орусиянын Коргоо министрлиги Суджа чек ара бекетинин ары жагындагы Басивка айылынын орус аскерлери тарабынан алынганын жана украин күчтөрүнө Сумы аймагында 12 башка жерден сокку урулганын жарыялады.

Ошондой эле орус аскерлери Орусиянын ичиндеги Горнал, Гуево жана Олешня сыяктуу конуштарда жайгашкан украин аскерлеринин мизин майтарганы кабарланды.

Ким көзөмөлдөйт?

Согуштун жүрүшүнө күн сайын көз салып турган Украинаны колдогон DeepState картасына ылайык, Украина учурда Орусиянын 63 чарчы чакырымдай аймагын көзөмөлдөйт. Бул көрсөткүч Киев былтыр жарыялаган 1400 чарчы чакырымдан бир топ азайды.

 Чек ара тилкесинде жайгашкан 81 чарчы километр аянт, анын ичинде Басивка «көзөмөлдүк статусу белгисиз» зонасына кирет.

Учурда Орусия Украинанын аймагынын бештен бир бөлүгүн көзөмөлдөйт. Бул аймактарга 2014-жылы аннексиялап алган Крымдын баары, Лугансктын дээрлик бардыгы жана Донецк, Запорожье жана Херсон облустарынын 70 пайыздан ашыгы кирет. Кошумчалай кетсек, Харьков облусунун бир аз бөлүгү Орусиянын көзөмөлүндө.