Эл аралык атомдук энергия агенттигинин (МАГАТЭ) башчысы Ирандагы акыркы окуяларга байланыштуу агенттиктин Башкаруучу кеңешинин шашылыш жыйынын өткөрүүгө чакырды.
“Ирандагы шашылыш кырдаалды эске алуу менен мен эртең @IAEAorg Башкаруучу кеңешинин шашылыш жыйынын чакырам”, – деп жекшемби күнү Рафаэль Мариано Гросси X социалдык тармагында жарыялады.
Бул кадам АКШ күчтөрү Ирандагы үч өзөктүк объектти, анын ичинде Фордо заводун бутага алгандыгы тууралуу кабарлардан кийин жасалды.
МАГАТЭ өзүнүн башка билдирүүсүндө: “Ирандагы үч өзөктүк объектке, анын ичинде Фордо заводуна болгон чабуулдардан кийин, учурда сырттагы радиация деңгээлинин жогорулаганы тууралуу маалымат жок” деп ырастады.
Агенттик кошумчалагандай, “Ирандагы кырдаал боюнча кошумча маалыматтар жеткиликтүү болгондо, мындан ары баа берүү жүргүзүлөт.”
Ошол эле учурда, Тегеран АКШнын чабуулдары боюнча иликтөө жүргүзүүнү талап кылууда.
Ирандын өзөктүк иштери боюнча башчысы Мухаммед Ислами Гроссиге кат жазып, МАГАТЭни Вашингтондун аракеттерин айыптоого жана “тиешелүү чараларды көрүүгө” чакырды, деп Ирандын SNN жаңылыктар тармагы билдирди.
Ислами ошондой эле Гроссини “аракетсиздик жана тилектештик” үчүн сынга алып, бул маселе боюнча мыйзамдуу жолдорду изилдей турганын айтты.
Өзөктүк куралды жайылтпоо келишиминен чыгуу
Башка жагынан алганда, Ирандын жогорку даражалуу депутаты Тегеран бул чабуулдарга жооп катары Өзөктүк куралды жайылтпоо келишиминен чыгышы мүмкүн экенин эскертти.
Иран Парламентинин Эл аралык иштер боюнча комитетинин башчысы Аббас Голроо X платформасындагы билдирүүсүндө келишимдин X беренеси Тегеранга өзгөчө кырдаалдарда келишимден чыгууга укук бергенин билдирди.
Голроо X статьясынан цитата келтирип, мындай деп айтты: «Эгер ар бир тарап өзүнүн улуттук эгемендигин пайдаланып, бул келишимдин предметине байланыштуу өзгөчө окуялар анын өлкөсүнүн жогорку кызыкчылыктарына коркунуч келтирет деп чечсе, келишимден чыгууга укуктуу» деп бөлүштү.
Жекшемби күнү эртең менен АКШнын президенти Дональд Трамп америкалык күчтөр Ирандын Фордо, Натанз жана Исфахфан деген үч өзөктүк объектисин бомбалаганын айткан.
Бул чабуулдар АКШ колдогон Израилдин Иранга каршы 13-июнда башталган аскерий операциясын дагы күчөттү жана операция Ирандын Израилге каршы жооп чабуулдарына түрттү.
