Түркия президентинин жубайы Эмине Эрдоган Израилдин Газадагы геноцидинин экинчи жылдыгын эскерип, Израилди дүйнөнүн көз алдында Палестина элин жок кылууга аракет кылып жатат деп айыптады.

Эмине Эрдоган түрк социалдык NSosyal медиа платформасында “Моралдык багытын жоготкон мамлекет дүйнөнүн көз алдында Палестина элин жок кылууга аракет кылууда”, – деп жазды.

“Бирок зулум күчөгөн сайын геноцидге каршы бириккен жүрөктөрдүн үнү да күчтүү чыгууда”, – деп кошумчалаган Эмине Эрдоган акыркы эки жылдын ичинде Газа 67,000ден ашуун күнөөсүз адамдар, анын ичинде 20,000ден ашуун бала өлтүрүлгөн көрүстөнгө айланганын, ал жерде адамзаттын абийири тирүүлөй көмүлгөнүн белгиледи. Ошондой эле Израилдин кол салууларында бир дагы “моралдык, укуктук, гуманитардык же этикалык кызыл сызык” калбаганын бөлүштү.

Дүйнөнүн булуң-бурчтарынан ыктыярчылар Газа үчүн аба, жер жана деңиз аркылуу аракет кылып жатканын айтып, Жер Ортолук деңизиндеги жардам флотилияларын эске салган Эмине Эрдоган “ар бир абийирдүү адамды бул күрөшкө кошулууга жана адилеттүү, туруктуу тынчтык орногонго чейин Палестина үчүн биримдикте болууга” чакырды.

“Израилдин чабуулдарында шейит кеткен палестиналык бир туугандарыбызды таазим кылып эскерем жана чыдамдуулук менен бекем турган Палестина элине Жараткан Аллахтан жеңиш жана жеңилдик тилейм” – деп жазды.

Постто ошондой эле Эрдогандын Газа боюнча мурдагы сөздөрү жана аймактагы кыйроолорду көрсөткөн видео да камтылды.