Асаддан кийинки мезгилде Стамбулдагы Сабиха Гөкчен эл аралык аэропортунан Сириянын борбору Дамаскка биринчи каттам ийгиликтүү аткарылды.

AJet авиакомпаниясынын билдирүүсүнө ылайык, Жакынкы Чыгыштын маанилүү борборлорунун бири болгон Дамаскка Сабиха Гөкчен аэропортунан күнүмдүк каттамдар башталды.

AJet ушундайча 13 жылдан кийин Стамбулдагы Сабиха Гөкчен аэропортунан Дамаскка каттамдарды аткарган биринчи авиакомпания болуп калды.

Эки сааттык учуу аяктагандан кийин жүргүнчүлөр Дамаск эл аралык аэропортунда салтанат менен тосуп алынды.

Дамаскта өткөрүлгөн тосуп алуу аземинде сөз сүйлөгөн AJet авиакомпаниясынын башкы директору Керем Сарп, Түркиядан Дамаскка 13 жылдан кийин биринчи каттамды аткаргандыгы үчүн сыймыктангандарын билдирди.

Сарп: "Бүгүн биз Стамбулдан Дамаскка биринчи каттамыбызды аткардык. 4-июль жума күнү Анкарадан Дамаскка түз каттамыбызды баштайбыз" деди.

“Бул AJet авиакомпаниясын Анкарадан Дамаскка көп жылдан кийин түз каттамдарды ишке ашырган биринчи авиакомпания кылат” деп кошумчалады.

"Мындан ары AJet Стамбулдан күнүмдүк учууларды, ал эми Анкарадан Дамаск эл аралык аэропортуна жумасына үч каттамды аткарат," деди.

Сириядагы жаңы мезгил менен бирге аймакта тынчтык жана ырааттуулукка карай кадамдар жаңы багыттын маанилүүлүгүн дагы бир жолу ачыкка чыгарганын баса белгилеп, Жакынкы Чыгыштын байыркы шаарларынын бири болгон Дамаскка түз каттамдардын Сириянын калыбына келүү процессинде гуманитардык жана соода алакаларынын жанданышына, бир туугандыктын бекемделишине жардам берерин кошумчалады.

AJetтин 34 өлкөдө жалпы 59 пунктка каттамдарды жүргүзүп жатканын айткан Сарп, Дамаск каттамдары менен бирге Европа, Жакынкы Чыгыш, Орто Азия жана Түндүк Африкада өсүү максаттарын улантууга чечкиндүү экендиктерин билдирди.