Киев менен Вашингтон кен байлыктар боюнча ири келишимге кол койгондон бир күн өткөндөн кийин расмий өкүлдөр жума күнү Орусиянын Украинадагы чабуулдарынан 30дан ашуун кишинин жарадар болгонун билдирди.

Украина бул келишим Вашингтондун коопсуздук кепилдиктерин камсыз кылуусуна жол ачат деп үмүттөнүүдө. Украина үч жылдан ашуун убакыттан бери Орусиянын басып кирүүсүнө каршы күрөшүп келет.

«Душмандын түнкү чабуулунун натыйжасында 29 адам жаракат алды», – деп Запорожье облусунун губернатору Иван Федоров Telegram аркылуу билдирди. Дрон чабуулунун курмандыктарынын арасында 13 жаштагы баланын да бар экенин кошумчалады.

«Орустар шаардын жарандык инфраструктурасын бутага алышты. Турак жайлар, университет жана инфраструктуралык объект зыян тартты», – деп жазды Федоров.

Ошондой эле Днепропетровск облусундагы орус дрон чабуулунан эки киши жаракат алып, эки жерде өрт чыкканын губернатор Сергей Лысак Telegram аркылуу билдирди.

Украинанын улуттук темир жол компаниясы Запорожьедеги локомотив оңдоо заводу түн ичинде «чоң чабуулга» кабылганын жана бул өрттүн бир нече саатка созулганын билдирди. Жабыркагандар катталган жок.

Орусиянын Коргоо министрлиги абадан коргонуу системалары түн ичинде Украинанын 121 учкучсуз аппаратын атып түшүргөнүн, алардын көбү Орусия 2014-жылы аннексиялап алган Крым жарым аралынын үстүнөн жок кылынганын жарыялады.

Акыркы чабуулдар Украинанын президенти Владимир Зеленский Америка Кошмо Штаттары менен түзүлгөн кен байлыктар боюнча келишим эки тарапка тең “тең” пайда алып келет, бирок келишим Киев үчүн конкреттүү коопсуздук кепилдиктерин бербейт деп айткандан кийин болду.

Украинанын лидери союздаштарын «Орусияны тынчтандыруу жана сүйлөшүүлөргө мажбурлоо үчүн» кысымды күчөтүүгө чакырды.