Европа Комиссиясынын төрайымы Урсула фон дер Ляйен шаршемби күнкү билдирүүсүндө “Акыркы дрон окуялары жана аба мейкиндигин бузуу учурлары Европанын гибриддик согуш менен бетме-бет келгенин көрсөтүүдө. Аны салттуу коргонуу ыкмаларынан тышкаркы чаралар менен чечүү керек" деди.
Страсбургдагы Европа Парламентинде сүйлөгөн сөзүндө фон дер Ляйен бул абалдын жөн гана кокустук эмес экенин айтып: “Бул биздин жарандарды тынчсыздандыруу, чечкиндүүлүгүбүздү сыноо, Биримдигибизди бөлүп-жаруу жана Украинаны колдоо аракеттерибизди алсыратуу максатында жүргүзүлүп жаткан курчутуучу операция болуп саналат. Ага ат коюуга убакыт келди. Бул гибриддик согуш” деди.
Фон дер Ляйен бардык окуялар үчүн Орусияны күнөөлөгөн жок, бирок Орусиянын Европада “бөлүнүүнү жаратуу” максатын көздөп жатканы айдан ачык экенин белгиледи.
Европалык жетекчилер соңку окуялардын айрымдары үчүн Москваны жооптуу деп эсептейт.
“Орусиянын гибриддик согушуна каршы күрөшүү салттуу коргонуу чаралары менен гана чектелбейт,” - деген фон дер Ляйен: “Бул барыбыз үчүн жаңы ой жүгүртүүнү талап кылат. Биз же артка чегинип орус коркунучтарынын күчөшүн карап турабыз же болбосо биримдик, алдын алуу жана чечкиндүүлүк менен жооп кайтарабыз”-деди.
