Орусиянын Сочи шаарындагы мунай кампасында чыккан өрттү өчүрүү үчүн 120дан ашык өрт өчүрүүчү аракет кылып жатканын Краснодар аймагынын губернатору Вениамин Кондратьев Telegram социалдык тармагында билдирди.
Сочи шаары жайгашкан Краснодар аймагында 2,000 куб метрлик күйүүчү май сакталган резервуар өрттөнгөнү тууралуу жекшемби күнү Орусиянын Риа Новости агенттиги өзгөчө кырдаалдар кызматтарына шилтеме берип кабарлады.
Орусиянын жарандык авиация башкармалыгы Росавиация Telegram аркылуу Сочинин аэропортунда учуулар коопсуздукту камсыздоо максатында токтотулганын билдирди.
Кондратьев бул чабуул Сочинин Адлер районунда болгонун жана бул Украина тарабынан Орусиянын согуш аракеттерине маанилүү деп эсептелген инфраструктурага жасалган акыркы чабуулдардын бири болуп саналаарын айтты.
Өткөн айдын аягында Адлер районунда украиналык учкучсуз учуучу аппараттын чабуулунан бир адам каза болгон, бирок 2014-жылкы Кышкы Олимпиада оюндары өткөн Сочиге бул согуш башталган 2022-жылдын февраль айынан бери чабуулдар сейрек кездешет.
Кара деңиздин жээгинде жайгашкан Краснодар аймагында орун алган жана Орусиянын түштүгүндөгү эң ири мунай иштетүүчү жайлардын бири болгон Ильский мунай заводу Украинанын учкучсуз учуучу аппараттарынын көп жолу бутасы болгон.
Ошондой эле жекшемби күнү Орусиянын түштүгүндөгү Воронеж облусунун губернатору украиналык учкучсуз учуучу аппараттын чабуулунан бир аял жаракат алганын жана бир нече өрт чыкканын билдирди. Ошол эле учурда, Орусия Киевге ракеталык чабуул жасаганын Украинанын борборунун аскердик администрациясы маалымдады.
