Польша Россиянын Польша коопсуздук блүктөрүнүн Москвада жогорку мартабалуу орус аскердик чалгындоо кызматкерине карата кол салуу аракетинде болду деген дооматын четке какты.
Жергиликтүү басылмалардагы маалыматтарга ылайык, Польшанын Аскердик чалгындоо бөлүмүнүн башчысы генерал-майор Ярослав Строжик шейшемби күнү билдирүү жасап, Россиянын Федералдык коопсуздук кызматынын (ФСБ) айткандарын ички коомчулукка багытталган "адаттагы дезинформация" деп мүнөздөдү.
Орус жетекчилер Россиянын аскердик чалгындоо уюму ГРУнун башчысынын орун басары генерал-майор Владимир Алексеевдин 6 - февралда Москвада бир нече жолу ок жеп, ооруканага жаткырылганын жана кол салуучунун окуя болгон жрден качканын билдирди.
Жетекчилер кийинчерээк Украинада туулган, 66 жаштагы орус жараны Любомир Корбанын Дубайдан Россияга жөнөтүлгөнүн, Алексеевди жарадар кылуу менен айыпталганын билдирди.
ФСБ кол салууну Украинанын чалгындоо кызматы пландаштырганын жана Польшанын чалгындоо кызматынын шектүүнү жалдоого катышканын билдирди. Ал эми Россиянын маалымат каражаттары Польшанын түштүгүндөгү Катовице шаарында жашаган Польшанын жараны Корбанын уулу атасын Польшанын чалгындоо кызматынын координациясы менен жумушка алууга жардам бергенин билдирди.
Польшанын басма сөз агенттигине (PAP) маалымат берген генерал Строжик Польшанын Россия жана Беларустагы кол салуу же диверсиялык аракеттерге катыштыгы бар деген дооматтарды четке какты. Строжик бул айыптоолор Россия менен Беларустун НАТО жана батыш өлкөлөрүнүн туруктуу кысымы астында экени тууралуу пропаганданы колдоо максатында ортого салынганын айтты.
Строжик бул дооматтардын Польшанын Коргоо министрлигинде көптөн бери иштеп келген орус тыңчысынын Варшавада камакка алынышы менен жарым-жартылай байланыштуу болушу мүмкүн экенин белгиледи. Бирок бул билдирүүлөрдүн негизги максаты — орус жана беларус элдерин адаштыруу экенин кошумчалады. Ошондой эле Строжик бул дооматтардын чоң эл аралык медиа каражаттары аркылуу жайылышын «тынчсыздандыруучу» деп мүнөздөдү.
Ярослав Строжик Польшанын чалгындоо бөлүмдөрү мыйзам чегинде жана өлкөнүн премьер-министри менен президенти баш болгон жогорку даражалуу мамлекеттик кызматкерлердин саясий көзөмөлү астында иштеп жатканын баса белгиледи.
