Бириккен Улуттар Уюмунун (БУУ) Башкы катчысы Антонио Гутерриш Орусиянын Киевди кошо алганда, Украинанын шаарларына аба соккуларын "катуу айыптаганын" билдирди.

БУУнун Башкы катчысынын басма сөз катчысы Стефан Дюжаррик Нью-Йорктогу БУУнун штаб-квартирасында өткөн күнүмдүк басма сөз жыйынында Жакынкы Чыгыштагы жагдайларга байланыштуу маалымат берди.

Баш калаа Киевге жана Украинанын башка шаарларына дрондук жана ракеталык аба соккуларына байланыштуу Дюжаррик: "Бул калктуу конуштарга жасалган чабуулдардын көбөйүшүнүн дагы бир кайгылуу мисалы", - деди.

"Башкы катчы, Орусия Федерациясынын куралдуу күчтөрү тарабынан борбор калаа Киевге жана Украинанын башка шаарларына жасалган ири масштабдуу ракеталык жана дрондук чабуулдарды катуу айыптайт", - деген Дюжаррик, бул чабуулдар ондогон карапайым тургундардын өлүмүнө жана жаракат алышына алып келип, инфраструктурасына чоң зыян келтиргенин кошумчалады.

Дюжаррик: "Жаңжалдын Орусия Федерациясынын аймагында да уланып жатышына байланыштуу Башкы катчынын терең тынчсыздануусун билдире алам", - деди.

“Бул кол салуулар эл аралык гуманитардык укукту ачыктан-ачык бузуу болуп саналат жана тезинен токтотулушу керек” деп билдирген Дюжаррик, Гутеррештин "дароо жана шартсыз ок атышууну токтотуу" чакырыгын жеткирди.

Украина президенти Владимир Зеленский кечээ эртең менен Киевге кол салууларда 12 адам каза болуп, 40 адам жаракат алганын кабарлаган.

Киевдин мэри Виталий Кличко орус армиясынын чабуулдарынан кийин 21-августту Киевде аза күтүү күнү деп жарыялаган.