Түркия Израилдин Сирияга карата аскердик агрессиясын катуу айыптап, бул аракеттер өлкөнүн он төрт жылдан бери уланып келе жаткан жаңжалдан кийин туруктуулукка жана калыбына келтирүүгө болгон жолун түздөн-түз бууп жатканын эскертти.
Бейшемби күнү БУУнун Коопсуздук Кеңешинде Түркиянын БУУдагы өкүлү Ахмет Йылдыз:“14 жылдык азаптан кийин сириялыктар эми гана тынчтыкка жана туруктуулукка жетүү мүмкүнчүлүгүнө ээ болушту”, – деди.
“Көптөгөн кыйынчылыктарга карабастан, алар бул максатка жетүү үчүн тез кадамдарды жасашты. Жети айдын ичинде таң калыштуу ийгиликтерге жетишти”, – деп баса белгилеген Йылдыз Сириянын жетекчилиги инклюзивдүү саясий өтүү жана коомдун ар кайсы катмарлары менен кеңири кызматташуу аркылуу улуттук элдешүүгө умтулуп жатканын айтты.
Йылдыз Түркиянын Сириянын калыбына келтирүү жана тынчтык процессин дайыма колдоп келгенин белгилеп, бул аракеттерге эл аралык колдоонун өсүп жатканын айтты.
Бирок ал Израилдин 8-декабрдан бери токтобой жаткан “чабуулдары” бул аракеттерди үзгүлтүккө учуратууну көздөп жатканын эскертти.
Йылдыз сөзүн улантып:“Израилдин тынымсыз агрессиясы Сириянын социалдык биримдикке негизделген калыбына келтирүү аракеттерин түздөн-түз бузуп жатат. Израилдин аралашуулары жана чагымчыл билдирүүлөрү өлкөнүн эгемендигине жана аймактык бүтүндүгүнө коркунуч келтирип жатат”,-деп белгиледи.
“Президенттик сарайды жана Коргоо министрлигин бутага алган бул чабуулдар Израилдин Сириянын же аймактын тынчтыгы менен туруктуулугуна кызыкдар эместигин ачык көрсөттү”, – деп кошумчалады Йылдыз.
Бардык мүчө мамлекеттерди Израилдин агрессиясын четке кагууга чакырып, ал Израилдин “чабуулдары аймакты туруксуздаштырып, жай тургундардын өлүмүнө жана жер которуусуна алып келүүдө” деп эскертти.
“Бул чабуулдардын масштабы жана географиялык чөйрөсү мурдагы режимге каршы багытталган чабуулдардан ашып кеткендиги да тынчсыздандырат”, – деди ал.
Сириянын эгемендигин урматтоо жана 1974-жылдагы Күчтөрдү ажыратуу келишимин сактоо зарылдыгын баса белгилеп, “эл аралык коомчулуктун милдети – сириялыктар бул жолдо жалгыз калбай турганын көрсөтүү” деп жыйынтыктады.
Сувайдадагы кагылышуулар жана Израилдин чабуулдары
13-июлда Сувейда провинциясында бедуин араб уруулары менен куралдуу друз топторунун ортосунда чакан кагылышуулар болду.
Друз топторунун аймакка жайгаштырылган коопсуздук күчтөрүнө каршы чабуулдарынан ондогон аскерлер каза болду.
Кагылышуулар күчөгөндөн кийин тараптардын ортосунда ок атышууну токтотуу келишими түзүлдү.
Бирок бул келишим көп өтпөй бузулуп, Израиль армиясы Сириянын коопсуздук күчтөрүн бутага алган чабуулдарды жасады.
Кечээ бейшемби күнү Израиль Сувайданын чет жакасын бомбалады.
Жергиликтүү маалыматтар боюнча, Сувайданын айылдык аймагындагы Валга айылы өзгөчө бутага алынып, жергиликтүү бедуин тургундарынын арасында каза болгондор жана жаракат алгандар болгон.
16-июлда Израил аба күчтөрү Сириянын президенттик сарайын, Башкы штабдын штаб-квартирасын жана Дамасктын Коргоо министрлигин бомбалады.
Ошол эле күнү Сувайдадагы өкмөт менен жергиликтүү топтордун ортосунда ок атышууну токтотуу кайрадан орнотулду, ал эми Израиль согуштук учактары Дамаск менен Дарааны бомбалады.
Коопсуздук күчтөрү Сувейдадан чыгып кеткенден бери, кагылышууларда жана Израилдин чабуулдарында жүздөгөн адамдар каза болгону болжолдонууда.
Бейшемби күнү Түркия жана он араб өлкөсү Сириянын биримдигин, эгемендигин жана аймактык бүтүндүгүн колдой тургандыгын кайрадан тастыктап, анын аймагына жасалган Израилдин кайталанган чабуулдарын айыпташты.
Сауд Арабиясынын Тышкы иштер министрлиги тарабынан жарыяланган биргелешкен билдирүүдө Түркия, Иордания, БАЭ, Бахрейн, Сауд Арабиясы, Ирак, Оман, Катар, Кувейт, Ливан жана Египеттин тышкы иштер министрлери Сириянын ички иштерине бардык чет элдик кийлигишүүлөргө каршы экенин билдиришти.
Министрлер Сувайдадагы акыркы ок атышууну токтотууну кубаттап, бул келишимди толук ишке ашырууга чакырышты, аны Сириянын биримдигин сактоо, жай тургундарды коргоо жана мыйзам үстөмдүгүн калыбына келтирүү үчүн маанилүү деп мүнөздөштү.
