Иран менен АКШнын ортосунда жакындап келе жаткан согуш ыктымалына байланыштуу кеңири божомолдор жайылгандыктан Тегерандагы кризистик башкаруу кызматкерлери даярдыктарын тездетишүүдө.
Ишемби күнү Тегеранда басма сөз өкүлдөрүнө маалымат берген Тегерандын Кризистик кырдаалдарды башкаруу агенттигинин башчысы Али Насири, Тегеран мэриясынын Пассивдүү коргонуу комитетинин борбор шаардагы бардык баш калкалоочу жайларда комплекстүү текшерүү жүргүзгөнүн билдирди.
Изилдөөнүн жыйынтыгында, мектептердеги 518 эски баш калкалоочу жай аныкталды, бирок алардын болгону 20 пайызы гана кайра колдонууга жарамдуу экендиги белгиленди.
Насири Тегеран боюнча 82 метро станциясы расмий түрдө баш калкалоочу жай катары бекитилгенин жана бул станциялардын ажаткана, суу жана тамак-аш запастары сыяктуу негизги жашоо муктаждыктары менен камсыздалганын айтты.
Метро системасынан тышкары, унаа токтотуучу жайлар жана коомдук комплекстер сыяктуу 300дөн ашык жер алдындагы аянттар да өзгөчө кырдаалдарда баш калкалоочу жай катары колдонууга боло тургандыгы аныкталды.
Тиешелүү уруксаттар жана процедуралар аяктагандан кийин, бул баш калкалоочу жайлар болжол менен 2,5 миллион адамды батыра алары белгиленди.
Тегерандын калкынын саны адатта 10дон 12 миллионго чейин деп эсептелет, ал эми ири метрополитан аймагын кошкондо бул көрсөткүчтүн 15–16 миллионго жетери болжолдонууда.
2025-жылдын июнь айында Иран менен Израилдин ортосунда тарыхта биринчи жолу болгон түздөн - түз аскердик кагылышуу учурунда, Тегерандын кээ бир аймактарынын жашоочулары жакын жердеги метро станцияларына баш калкалашкан.
12 күнгө созулган бул согуштан кийин, Ирандын кризистик кырдаалдарды башкаруу кызматкерлери, өзгөчө Тегерандагы метро станцияларын, унаа токтотуучу жайларды жана башка аянттарды коопсуз баш калкалоочу жайларга айландыруу үчүн комплекстүү кадамдарды ташташты.
Акыркы жумаларда Дональд Трамптын деңиз "армадасынын" Иранга бара жатканы тууралуу жарыясы жаңы согуш коркунучун күчөтүп, аскердик операция болушу мүмкүн экенин бекемдеди.
Иран өкмөтү ар кандай чабуулга катаал жооп кайтарыларын эскертти
