Жакынкы Чыгыш жаңжалынын көлөкөсүндө дүйшөмбү күнү миңдеген америкалык жана филиппиндик жоокерлер жылдык аскердик машыгууларын башташты.
Согуштук сценарийлер өлкөнүн түндүгүндөгү Тайвань кысыгына караган аймакта жана талаштуу Түштүк Кытай деңизинин жээгиндеги провинцияда чыныгы ок менен өткөрүлө турган машыгууларды камтыйт.
1400 кызматкерин жөнөткөн жапон амиясы түндүктөгү Паоай жээгинде бутага алынган кемени чөктүрүү үчүн Type 88 үлгүсүндөгү круиздик ракетаны колдонот.
Австралия, Жаңы Зеландия, Франция жана Канаданын аскерлери да катышкан 19 күндүк "Balikatan" же "Ийинге ийин" машыгууларына 17 000ден ашык жоокер, аба күчтөрү жана моряктар катышууда.
АКШнын машыгуу боюнча өкүлү подполковник Роберт Банн машыгуулар алардын "эркин жана ачык Индия-Тынч океан аймагына колдоосун" көрсөтүп турганын айтып, АКШнын аскер кызматкерлеринин санына анын өлкөсү Жакынкы Чыгышта жүргүзүп жаткан согуш таасир этпей турганын кошумчалады.
Аймактык чыңалуулар
Баликатан машыгуусу Иран, АКШ жана Израилдин ортосундагы согушту токтоткон эки жумалык ок атышпоо макулдашуусунун аякташына бир нече күн калганда өтүп жатат.
Бул жаңжал дүйнөлүк энергетикалык баа кризисин жаратып, импортко көз каранды болгон Филиппинди солкулдатты.
Машыгуулар Пекин Тайвандын айланасында аскердик кысымды күчөтүп жаткан учурда өткөрүлүүдө.
Интеграцияланган аба жана ракетадан коргонуу системалары, анын ичинде учкучсуз учуучу аппараттарга каршы технологиялар сыналат.
Япония танк-десанттык кеме, эсминец жана тик учак-десанттык эсминец жайгаштырууда, ал эми АКШ Филиппин жана Канаданын фрегаттарына кошулуу үчүн патрулдук кемени жана док-десанттык кемени колдонот.
