Израиль Газа тилкесинде абадан жүргүзгөн соккуларынын натыйжасында дагы 70 палестиналыкты, анын ичинде аялдар менен балдарды өлтүрдү. Бул тууралуу ХАМАС уюму билдирип, Израиль карапайым калкка каршы агрессиясын азайтууда деген дооматтарды четке какты.
“Бул кан төгүүчү эскалация согуш кылмышкери Нетаньяхунун өкмөтүнүн карапайым калкка каршы аскердик операцияларды азайтуу боюнча айткан жалган сөздөрүн ашкерелейт”, – деп ХАМАС ишемби күнү тараткан билдирүүсүндө белгиледи.
Уюм эл аралык коомчулукту, араб жана ислам өлкөлөрүн палестиналыктарды коргоо, жардам көрсөтүү жана Газа тилкесиндеги эки жылдык “жок кылуу согушун” жана ачарчылыкты токтотуу үчүн басымды күчөтүү боюнча мыйзамдуу жана гуманитардык жоопкерчиликтерин аткарууга чакырды.
Газанын Медиа кеңсесинин билдирүүсүнө ылайык, Израилдин армиясы 93 абадан сокку уруп, анын натыйжасында 70 адам, анын ичинде 47 киши Газа шаарында каза болгон.
Бул окуя АКШ президенти Дональд Трамптын жума күнү Израилди “Газаны бомбалоону токтотууга” чакырганынан кийин болду. ХАМАС анын ок атышууну токтотуу сунушунун алкагында израилдик туткундарды бошотууга даяр экенин билдирген. Трамп бул кыймылга “туруктуу тынчтыкка” даяр деп ишенерин айткан.
Египет ишемби күнү Израиль жана ХАМАС делегацияларын дүйшөмбү күнү туткундарды алмашуу боюнча Трамптын Газа согушун токтотуу планынын алкагында сүйлөшүүлөрдү өткөрүү үчүн кабыл ала турганын жарыялады.
Трамп 29-сентябрда 20 пункттан турган планын жарыялап, анда Израилдин макулдугунан кийин 72 сааттын ичинде израилдик туткундарды бошотуу, ок атышууну токтотуу жана ХАМАСты куралсыздандыруу каралган.
Израилдин геноциди
Тель-Авивдин маалыматы боюнча, Газа тилкесинде 48 израилдик туткун бар, алардын 20сы тирүү деп эсептелет.
Ошол эле учурда Израиль 11100гө жакын палестиналык туткундарды кармап турат. Алардын көбү кыйноо, ачарчылык жана медициналык кароосуздукка дуушар болууда, деп палестиналык жана израилдик адам укугун коргоо уюмдары билдиришет.
Израиль Газа тилкесинде 67000ден ашуун палестиналыкты, анын ичинде аялдар менен балдарды өлтүрдү.
Ал бул аймактын көпчүлүк бөлүгүн талкалап, калктын дээрлик бардыгын жер которууга аргасыз кылды.
