Кытай жекшемби күнү Филиппинди АКШ жана Япония менен Түштүк Кытай деңизиндеги талаштуу аймактарда деңиз машыгууларын өткөргөнү үчүн сынга алды, деп билдирди мамлекеттик Синьхуа агенттиги.

Филиппиндин Куралдуу күчтөрү билдиргендей, алар жума жана ишемби күндөрү АКШнын Индо-Тынч океан командачылыгы жана Япониянын Деңиз өзүн-өзү коргоо күчтөрү менен биргеликте 11-Мультилатералдык Деңиз кызматташтык иш-чарасын өткөрүшкөн.

АКШнын социалдык медиа платформасы X аркылуу жарыяланган билдирүүдө бул машыгуу “Филиппиндин деңиздеги кызыкчылыктарын коргоого жана аймактагы тынчтык менен коопсуздукту сактоого болгон бекем милдеттенмесин дагы бир жолу ырастайт” деп айтылган.

Бээжин бул машыгууларга жооп катары Кытай Элдик-боштондук армиясынын (КЭБА) Түштүк фронт командачылыгы жума жана ишемби күндөрү Түштүк Кытай деңизинде күзөттүк иш-чараларды өткөргөнүн билдирди.

Командачылыктын басма сөз катчысы Тянь Жунли Филиппиндин Түштүк Кытай деңизи тууралуу «мыйзамсыз дооматтарды» жайылтып жатканын, аймактын тышындагы өлкөлөр менен «биргелешкен күзөт» деп аталган жана аймактагы «тынчтык менен туруктуулукту» бузуп жатканын айтты.

Тянь: «Филиппин тарапка Түштүк Кытай деңизиндеги чыңалууну күчөткөн аракеттерди жана провокациялоону тез арада токтотууну олуттуу түрдө эскертебиз»,-деди. Ал сырттан жардам алуу аракети майнапсыз болорун кошумчалады.

Тянь Түштүк фронт командачылыгы Кытайдын "аймактык эгемендигин жана улуттук коопсуздугун" чечкиндүү түрдө коргоо жана Түштүк Кытай деңизинде "тынчтык менен туруктуулукту" сактоо үчүн жогорку даярдыкта экенин баса белгиледи.

Ал: «Түштүк-Кытай деңизинде чыр-чатак чыгарууга же тартипти бузууга болгон ар кандай аракет ийгиликсиз аяктайт», - деди.