Армениянын премьер-министри Никол Пашинян өз өлкөсүндө орусиялык аскердик базанын болушу маанилүү эмес экенин айтып, "Эгерде Орусия аскердик базасын Армениядан чыгарып кетүүнү чечсе, биз буга каршы болбойбуз" деди.
Николь Пашинян 1-сентябрда Шанхай кызматташтык уюмунун (ШКУ) саммити учурунда Орусиянын президенти Владимир Путин менен өткөргөн жолугушуусуна сереп салды.
Пашинян жолугушуу позитивдүү өткөнүн жана жакынкы аралыкта Орусиянын борбору Москвага баруу боюнча макулдашканын билдирди.
Пашинян ошондой эле Путин менен Орусия башкарган Армениянын темир жолдорун талкуулаганын айтып, "Бул маселени чечүү керек деген түшүнүк болду. Азыркы кырдаал көпкө созулушу мүмкүн эмес" деди.
Армениядагы орусиялык аскер базасы тууралуу Пашинян: "Бул маселе көтөрүлгөн жок. Арменияда орусиялык аскер базасынын болушу өтө маанилүү эмес. Эгерде Орусия өзүнүн аскер базасын Армениядан чыгарып кетүүнү чечсе, биз буга каршы болбойбуз. Бирок эгер алар калуу каалоосун билдиришсе, бул теманы да талкуулоого даярбыз", - деди.
Орусиянын президенти Путин буга чейин Армениянын Гюмри шаарындагы орусиялык аскер базасы тууралуу: "Эгерде Армения бул инфраструктуранын кереги жок экенине чечим чыгарса, биз эртең эле чыгып кетебиз", - деп билдирген.
