Бейшемби күнү Ирандан учурулган дрондор Азербайжандын Нахчыван аймагына сокку уруп, Нахчыван эл аралык аэропортунун жанында өрт чыкты. Видеотасмада Ирандын чек арасынан 10 чакырым алыстыкта жайгашкан аэропорттун жанынан коюу кара түтүн көтөрүлүп жатканы байкалат.
Азербайжандын Тышкы иштер министрлиги бейшемби күнү түштөн кийин Ирандын аймагынан учурулган учкучсуз аппараттардын соккулары Нахчыван Автономиялык Республикасынын аэропортунун терминалын жана Шекерабад айылынын жанындагы мектеп имаратын бутага алганын ырастады.
Министрлик билдирүүсүндө: "Иран Ислам Республикасынын аймагынан жасалган дрон соккуларын катуу айыптайбыз, бул кол салуу аэропорттун имаратына зыян келтирип, эки жай тургундун жаракат алышына алып келди", - деп айтылды. Баку бул чабуулдарды аймактык чыңалууну күчөткөн эл аралык укукту бузуу катары сыпаттап, Ирандан тез арада түшүндүрмө берүүнү жана алдын алуу чараларын көрүүнү талап кылды. Билдирүүдө: "Биз Иран Ислам Республикасынан бул маселени тез арада тактап, түшүндүрмө берип, келечекте мындай окуялардын кайталанышына жол бербөө үчүн зарыл жана шашылыш чараларды көрүүсүн талап кылабыз", - деп айтылды.
Баку жооп кайтаруу укугун өзүнө калтырат
Азербайжан өкмөтү мындай чабуулдар кайталанса, тиешелүү чаралар менен жооп берүү укугун өзүнө калтыраарын эскертти.
Ирандын Азербайжандагы элчиси Можтаба Демирчилу Азербайжандын Тышкы иштер министрлигине чакыртылды. Министрлик: "Иран тарапка катуу нааразычылык билдирилет жана тиешелүү нааразылык нотасы тапшырылат", - деп маалымдады.
