Таиланддын премьер-министри Паетонгтарн Чинават шаршемби күнү парламентте ишеним көрсөтпөө добушунан cуурулуп чыгып, оппозициялык партиялардын аны миллиардер экс-премьер Таксин Чинаваттын марионеткасы деп айыптаган чакырыгын жеңип чыкты.
Оппозиция 38 жаштагы Паетонгтарндын өлкөнү башкаруудагы тажрыйбасыздыгын жана анын ишмердүүлүгүн сынга алган эки күндүк талкуудан кийин, депутаттар ишеним көрсөтпөө сунушун 319 добуш менен четке кагышты. Каршы добуш бергендердин саны 162 болуп, жети депутат болсо калыс позициясын карманды.
Паетонгтарн добуш берүүдө жеңишке жеткенден кийин өзүнүн колдоочуларына ыраазычылык билдирди.
"Бардык добуштар, колдогон жана каршы болгон, мени жана министрлер кабинетин эл үчүн тынымсыз иштөөгө шыктандырат," деп ал Facebook баракчасына жазды.
Таксин, Таиланддын заманбап тарыхындагы эң таасирдүү, бирок талаштуу саясатчы, 2023-жылы 15 жылдык өз ыктыяры менен сүргүндөн кийин өлкөгө кайтып келген.
Ал мурдагы коррупция жана бийликти кыянаттык менен пайдалануу боюнча айыптар үчүн сегиз жылдык түрмө жазасынын бир нече айын полиция ооруканасында өткөргөндөн кийин падыша аны кечирген. Бул анын жеңилдик менен мамиле көргөнү тууралуу ар кандай ушак-айыңдарды күчөткөн.
75 жаштагы Таксин 2001-2006-жылдардагы башкаруусунда жакыр тайлыктар арасында популярдуулукка ээ болгон, бирок аны падышалык консервативдүү элита коррупцияга жана манипуляцияга жакын деп жек көрөт.
‘Шайтандык келишим’
Паетонгтарн былтыр Пхеу Тай партиясы жетектеген коалициялык өкмөттү башкаргандыктан премьер-министр болуп дайындалган. Бул партия Таксин негиздеген саясий кыймылдын акыркы версиясы болуп саналат. Анын алдында премьер-министр Сретта Тависин соттун чечими менен кызматтан алынган.
Ишеним көрсөтпөө талкуусу учурунда оппозициядагы Элдик партиянын ачык сүйлөгөн депутаты Рангсиман Ром Паетонгтарнды атасына артыкчылык шарттарды түзүп берүү үчүн келишим түзгөн деп айыптады.
"Сиз атасыңызга башка туткундарга караганда жакшы шарттарды түзүү үчүн шайтандык келишим түздүңүз," деп ал парламентте айтты.
"Шарт мындай болгон: Сиздин атаңыз бир күн да түрмөдө отурбайт."
Паетонгтарн бул айыптоону четке кагып, атасынын падышалык кечиримге ээ болушу анын премьер-министр болуп дайындалышынан бир нече ай мурун болгонун белгиледи.
