Түркиянын Тышкы иштер министрлиги Израилдин Дамасктын борборун бутага алган акыркы аба соккуларын кескин айыптап, бул кол салуулар Сириянын тынчтыкты, туруктуулукту жана коопсуздукту орнотуу аракеттерине атайылап сокку уруу экенин билдирди.
Министрлик жекшемби күнкү билдирүүсүндө, "Израилдин Сириянын түштүгүндөгү аскерий кийлигишүүсүнөн кийин бул ирет Дамасктын борборуна жасаган кол салуулары Сириянын тынчтыкты, туруктуулукту жана коопсуздукту орнотуу аракеттерине каршы саботаж болуп саналат”, -деди.
Анкара мындай аракеттер согуштан жабыркаган өлкөнүн нормалдашууга карай сейрек жаралган мүмкүнчүлүгүнө коркунуч туудурарын эскертти.
Билдирүүдө “Сирия элинин алдында тынчтыкта жашоо жана дүйнө менен кайрадан интеграциялануусу үчүн тарыхый мүмкүнчүлүк бар”, — деп кошумчаланды.
Түркия Сириядагы саясий чечимди колдогон бардык тараптарды өкмөттүн тынчтыкты орнотуу аракеттерине конструктивдүү салым кошууга чакырды.
Израилдин Сирияга чабуулдары
Израилдин Сириянын борбору Дамаскка жасаган аба соккуларынын натыйжасында бир нече адам жаракат алды. Мамлекеттик кабар агенттиги SANA маалымдагандай, Сирия армиясынын Башкы штаб комплексин бутага алган буга чейинки кол салуусунда да кеминде эки адам жаракат алган.
Израилдин ошондой эле Президенттик комплекске жакын аймакты да бутага алганы кабарланууда.
Израиль шаршемби күнү Сириянын түштүгүндөгү Сүвейдага абадан сокку уруп, дагы бир жолу Сириянын эгемендигин бузду.
Кол салуулар куралдуу друздар менен бедуин топторунун ортосунда кеминде 30 киши набыт болгон кагылышуулардан кийин Сирия армиясы коопсуздукту сактоо жана жарандар менен мүлктөрдү коргоо максатында аймакка аскерлерин жайгаштырган учурга туш келди.
