Түркиянын Президенти Режеп Таййип Эрдоган келечек муундар үчүн "жашоого ыңгайлуу чөйрө" түзүү керектигин айтып, акыркы жылдардагы глобалдык ысынуу, чөлгө айлануу, айрым жаныбарлардын тукум курут болушу жана башка кырсыктардын "адамзаттын табиятка карата ырайымсыздыгына каршы табияттын коргонуу чарасы" экендигин баса белгиледи.
Президент Эрдоган жыл сайын 5-июнда белгиленүүчү Бүткүл дүйнөлүк айлана-чөйрөнү коргоо күнүнө карата жарыялаган билдирүүсүндө: "Жаратылыштын тили үнсүз, бирок билдирүүсү күчтүү жана ачык: биз ага кандай мамиле кылсак, ал да бизге ошондой мамиле кылат", - деди.
1972-жылы жарыяланган Бүткүл дүйнөлүк айлана-чөйрөнү коргоо күнү, жыл сайын башка тема жана кабыл алуучу өлкө менен белгиленет. 2025-жылдын темасы "Биздин жер. Биздин келечегибиз. Биз #калыбына келтирүүчү муунбуз" жана топуракты калыбына келтирүүгө, чөлгө айланууга жана кургакчылыкка чыдамдуулукка басым жасалууда. Бул жылкы иш-чаралар Сауд Арабияда өтөт.
Учурда жерди калыбына келтирүү маселеси көңүлдөрдү бурууда. Жалпы дүйнөдө 2 миллиард гектардан ашык жер бузулуп, бул 3,2 миллиард адамга таасирин тийгизүүдө. Жыл сайын 24 миллиард тоннадан ашык түшүмдүү топурак жоголууда.
Президент Эрдоган кайрылуусунда Дүйнөлүк айлана-чөйрөнү коргоо күнүнүн келечек муундар үчүн дагы жашыл жана туруктуу дүйнө курууга чакыруу экендигин белгиледи.
«Биз жерибизди, суубузду, абабызды жана токойлорубузду мурас катары эмес, келечек муундар үчүн аманат катары карайбыз. Бул аманаттын талаптарын аткаруу биздин эң негизги милдеттерибиздин бири», – деди.
Эрдоган Түркиянын жаратылышты коргогон долбоорлорду колдогондугун, жашыл энергия, кайра иштетүү, таштандысыз жана жаратылышка жакын урбанизация саясаттарын ишке ашыруу үчүн комплекстүү кадамдарды таштаганын айтты.
«Бул өзгөчө күнү биз балдарыбызга таза табият калтыруу үчүн табият менен шайкеш жашоо маданиятын түзүүнү максат кылабыз», – деп кошумчалады.
Эрдоган Түркия кылымында Түркиянын дүйнөдөгү жашоого эң ыңгайлуу табиятка ээ жана табигый ресурстарды натыйжалуу пайдаланган өлкө болуу максатына жетерин айтты.
Президент ошондой эле энергияны үнөмдөө, калдыктарды башкаруу, табиятты коргоо жана экологиялык жактан таза керектөө адаттарына көңүл бурууга чакырды.
Түркиянын биринчи айымы Эмине Эрдоган "Нөлдүк калдыктар" долбоору жана ага байланыштуу демилгелер аркылуу экологиялык туруктуулукту колдоп келет.
Бириккен Улуттар Уюмунун “Нөлдүк калдыктар” боюнча жогорку деңгээлдеги консультативдик кеңешинин төрайымы Эмине Эрдоган калдыктарды азайтуу, кайра иштетүүнү кубаттоо жана айлана-чөйрөнү коргоо боюнча маалымдуулукту жогорулатуу үчүн иштеп жатат. Бул аракеттер айланма экономиканы колдоого жана климаттык кризиске каршы күрөшүүгө багытталган.
Анын жетекчилиги астында 2017-жылы башталган Түркиянын "Нөлдүк калдыктар" демилгеси 552 миллион даракты сактап, 150 миллион тонна парник газдарынын бөлүнүп чыгышын алдын алып, 1,7 триллион куб метр сууну үнөмдөдү.
Бул демилге 74 миллион тоннадан ашык калдыктарды кайра иштетип, 256 миллиард лира (6,7 миллиард доллар) экономикалык үнөмдөөгө жетишти.
